Киир

Киир

Хой

Бу эйиэхэ наһаа бэрт кэм буолбатах эрээри, уустуктары барытын холкутук кыайыаҥ. Бу нэдиэлэ устата “Кыаллары барытын оҥорботум, ситэ арыллыбакка сылдьабын” диэн бэйэҕин мыынар, саарбахтыыр санаа үүйэ-хаайа тутуо. Үлэҕин уларытыаххын баҕарыаҕыҥ. Оннук санааҕа бэринимэ: эн тугу барытын сөпкө оҥорон иһэҕин, үлэҥ да үчүгэй. Ити санаа баттыга — күүскүн-кыаххын түмэн өссө үрдүк таһымҥа тахсан эрэриҥ бэлиэтэ.

Оҕус

Оҕус бэлиэлээх дьону “Аан дойду барытын үрдүнэн ил-эйэ олохтоноругар наадыйбат, бэйэлэрин дьиэлэрин эрэ таһымынан сылдьар холку, аа-дьуо дьон” диэччилэр. Ол да гыннар, бу нэдиэлэҕэ оҕус бэйэтин дьолун-соргутун, кэскилин туһугар күүскэ охсуһара наада. Кини кырдьыгын көмүскээн элбэх хапсыһыыны аастаҕына, бэйэтин Дьиҥнээх Оҕус курдук көрдөрдөҕүнэ эрэ сатанар.

Игирэлэр

Игирэлэр бу нэдиэлэҕэ тугу да гыммакка сыппыттара ордук. Үлэлии-хамсыы сатаан ордук хос кыһалҕаны, эбии эрэйи эрэ булан ылыаххыт. Төһөнөн сытаҕыт-сынньанаҕыт да, соччонон сыалгытыгар-соруккутугар чугаһаан иһиэххит. Тугу да тобула-быһаара сатаан эрэйдэнимэҥ, дьону кытта иирсимэҥ, доруобуйаҕытын харыстаныҥ. Үлэлээбитэ буолан сүпсүгүрбүккүт атын дьону кытта иирсээҥҥэ эрэ тиэрдиэн сөп.

Араак

Ыал араактар кэргэннэрин кытта өйдөһүмүөхтэрин сөп. Эн аһара сымнаҕас, наҕыл майгыгыттан эр ылан, өрө баран, кэргэниҥ төбөҕөр өссө ыттан иһиэн баҕарыаҕа. Ону аһаҕас иирсээҥҥэ тиэрдибэккэ, тулуйарга кыһан. Иккис улахан кыһалҕа: үлэҥ салалтатын кытта тыҥааһыннаах сыһыан үөскүөҕэ. Салалтаҥ букатын кэрээниттэн тахсыбыт курдук, араас ньүдьү-балай ирдэбиллэри туруорар... Нэдиэлэ иккис аҥаарыгар ол барыта сааһыланыа, оннун булуо, өссө харчы киириэ.

Хахай

Наһаа үөрэн-көтөҕүллэн, дууһаҥ “нэлэччи” арыллан сылдьарын, өс киирбэххин көрөн атыттар туһана сатыахтара. Онон, дьону төһө да итэҕэйбитиҥ иһин – бастаан бэрэбиэркэлээ. Кистэлэҥ сонуну кимиэхэ да мээнэ арыйан биэримэ. Хата, бу нэдиэлэни өрүсүһэн ыйааһыҥҥын түһэрэргэ кыһан, ырарга аһара табыгастаах кэм. Кыратык хамсанныҥ да, сыаҥ бэйэтэ ууллан барыаҕа.

Кыыс

Бу нэдиэлэ – сиэмэх, адьырҕа, сыалларын тугу да кэрэйбэккэ ситиһэр дьон табыллар кэмнэрэ. Бу кэмҥэ хантан эрэ “тоҕо тардан” ылбыт харчыгынан дьиэ кэргэҥҥин хас да ый холкутук иитиэххин сөп. Кистэлэҥ кэпсэтиилэр уонна олох иһин охсуһуу күннэрэ. Аны биир ыйынан төрөөбүт күнүҥ! Ол кэлиэ биир ый инниттэн “күлүк кэмэ” саҕаланар. Аттыгар туох барыта тиллэн, тыынан, иччилэнэн кэлэр. Интуицияҕын эрэн, оччоҕо барыта табыллыа.

Ыйааһын

Нэдиэлэ бастакы аҥаарыгар олох бары эйгэтигэр тыҥааһын үөскүүр чинчилээх. Ордук чуолаан, дьиэ кэргэҥҥит иһигэр. Үлэҕитигэр-хамнаскытыгар да балаһыанньа соччо бэрдэ суох. Ону барытын утарыласпакка тулуй. Буурҕа хаһан эрэ син биир астар. Нэдиэлэ иккис аҥаарыгар сайдыы саҥа саҕахтара арыллыахтара, сонун уонна туһалаах дьону кытта билсиэххит. Сүрэххин көрүнэ сырыт, ыалдьыаххын сөп.

Скорпион

“Өйдөөх киһи хайаны дабайбат, эргийэ барар” дииллэр. Өр кыайтарбакка сылдьар кыһалҕаны атын, сонун, дьону соһутар ньыманан быһаарар ордук. Уустугу кыайар саҥа албаһы тутуннуҥ да – кыайыы эйиэнэ. Уруккулуу үөрүйэххинэн дьаһанан туһаҥ суох. Дьону кытта төһөнөн аҕыйахтык алтыһаҕын да, ньиэрбэҥ соччонон бүтүн сылдьыа. Нэдиэлэ иккис аҥаарыгар “ыйааһыннаах” киһи көмөтүнэн сыалгын ситиһиэҥ.

Охчут

Аптаах-алыптаах нэдиэлэ үүммүт. Араас иччилээх түүллэри түһүүгүн, билгэлэнэҕин, бэйэҕин экстрасенс буолбут курдук сананаҕын. Ол эрээри ити түүлүҥ барыта – сымыйа, итэҕэйимэ, бэйэҕэр эрэ сыһыаннаах түүллэр туолуохтара. Эми иһимэ, туһатынааҕар буортута элбэх буолуо. Тапталга сыһыан олус сырдык, араас өҥнөөх уонна чаҕылхай буолуоҕа. Нэдиэлэ иккис аҥаара айаҥҥа, үөрэххэ, доҕоттору кытта алтыһарга үчүгэй буолуо.

Чубуку

Тыҥааһыннаах кэм. Эр санааҕын мунньунан баран, тулалыыр дьонуҥ туһунан тугу саныыргын барытын сирэйдэригэр малтаччы этэн кэбис! Биллиннэр. Билигин кытаанах, күүстээх быһаарыныылар кэмнэрэ. Мөлтөөн биэрдэххинэ, үрдүгүнэн хаамыахтара. Кимиэхэ да иннигин биэримэ. Оннук эрэ дьаһаннаххына быыһанар, кыайар кыахтааххын. Дьиэҕэр дьону ыалдьыттата ыҥырыма, аймахтаргын мунньума.

Күрүлгэн

Карьера кирилиэһин дабайан үөһэ ыттан иһэргэ бэртээхэй кэм. Бу нэдиэлэҕэ күрүлгэннэр аттыларыгар сылдьар конкуреннарын иннигэр түһэн куоталларыгар, салалта иннигэр “очукуо” хомуйалларыгар күүс-кыах бөҕө бэриллиэ. Үлэлиир-хамсыыр, кыайар-хотор кыах хара баһаам. Дьиэни-уоту, оҕону-урууну барытын умнан туран үлэлэригэр умса түспүт дьону улахан ситиһии, карьера күүтэр.

Балыктар

Наһаа ноҕуруускаланыма, бэйэҕин харыстан. Эн уопсай туругуҥ үлэҕэр, тулаҕар балаһыанньаттан, дьон сыһыана хайдаҕыттан олус улахан тутулуктаах. Үөскүүр быһыыга-майгыга холкутук, бөлүһүөктүү сыһыаннаһа сатаа. Соччо биһирээбэт эрээри, бииргэ үлэлиир эрэ буолан тулуйса сылдьар дьоҥҥун кытта ыксалаһыма. Кэллиэгэлэри кытта уустук сыһыан үөскээтэҕинэ, сымыйанан мичээрдээбитэ буолан ымаҥнаа. Аахсар кэм кэлиэҕэ.

Тарҕат:

Санааҕын суруй