Хой
Тапталынан уонна айар иэйиинэн толору нэдиэлэ. Төһө да хаһаайыстыба түбүгэ элбэҕин иһин, олоххо үчүгэйи була, көрдүү сатаа. Тула өттүгэр үөрүү-көтүү элбэх, ону таба көрүөххэ эрэ наада. Доруобуйаҕар болҕомтоҕун уур. Нэдиэлэ ортотугар уонна бүтүүтүгэр таптал силигилии ситиэ. Таптыыр киһилээх буоллаххытына, сыһыаҥҥыт тупсан ырайга көтүө. Тапталга билинэргэ, ыал буоларга, бырааһынньыкка сылдьарга үтүө кэм.
Оҕус
Дьиэҕитигэр-уоккутугар усулуобуйа үчүгэйэ бэрт буолан, ханна да барыаххытын баҕарбаккын. Күүскүтүн-кыаххытын дьиэҕитин өрө тардыыга туһаайыҥ, көстүүнү тупсарар малла-салла атыылаһыҥ. Ыалдьыттары көрсөргө, бырааһынньыгы тэрийэргэ эмиэ үчүгэй кэм. Даачалаах буоллаххытына, бары дьиэнэн тахсан үлэлээҥ, сынньаныҥ. Дьиэ кэргэн иһигэр сыһыан муҥутуурдук тупсан турар кэмэ.
Игирэлэр
Дьону кытта бэрт элбэх уонна интэриэһинэй алтыһыылар күүтэллэр. Наһаа элбэх сонуну истиэҥ. Дьону кытта элбэхтик кэпсэтэр, дэлэй информацияны ылар буолан, чугас эргимтэҕэр “наһаа элбэҕи билэр киһи” диэн имиджтэниэххин сөп. Урукку өттүгэр ыалларгын кытта сыһыаныҥ хаҕыс соҕус буоллаҕына, бу нэдиэлэҕэ сыһыаҥҥыт ирэн-тупсан кэлиэ. Быһата, билиини-көрүүнү сомсорго, үөрэнэргэ үтүө кэм.
Араак
Баайы-дуолу хаҥатарга, харчыны хаһыйарга бэртээхэй нэдиэлэ. Хамнаскын эбэннэр дуу, бириэмийэ биэрэннэр дуу, дохуотуҥ элбиэхтээх, хайаан да... Үөрүүлээх сонун онон эрэ бүппэт. Уруккуттан ыралана сылдьыбыт үтүө малгытын атыылаһар кыахтаныаххыт. Бу кэмҥэ атыыласпыт малгыт (муодунай таҥас, ускуустуба эбэтэр ювелир оҥоһуга...) ураты хаачыстыбалаах буолан үөрдүөҕэ, өр сулууспалыаҕа.
Хахай
Кыыс хахайдары – эр дьоҥҥо, эр дьону – кэрэ аҥаардарга, улахан ситиһии күүтэр. Имиджи уларытарга табыгастаах кэм. Майгыҥ-сигилиҥ, тас дьүһүнүҥ, таҥнар истиилиҥ уларыйбытын көрөн бары хайгыахтара, сөҕүөхтэрэ. Тугуҥ да уларыйбатаҕын да иһин, син биир дьон бары эн искиттэн сыдьаайар үтүө уларыйыыны бэлиэтии көрүөхтэрэ. Сайдарга-үүнэргэ, айанныырга, саҥа дьону кытта билсэргэ үчүгэй нэдиэлэ.
Кыыс
Уоскулаҥ уонна манньыйыы-сылаанньыйыы нэдиэлэтэ. Чуумпу сири булан айантан, сахсаантан, уопсастыбаттан сынньаныаххын баҕараҕын. Ханна эрэ ыраата балыктыы, сир астыы барыаххын, дууһаҕын уоскутуоххун сөп. Соҕотоҕун хаалан медитациялаа, өйгүн-санааҕын сааһылан. Бу кэмҥэ ону-маны таайар, билгэлиир дьоҕургут уһуктан, уруккуттан аала сылдьыбыт кистэлэҥи таайыаххын сөп.
Ыйааһын
Бу нэдиэлэҕэ муҥутуур ыра санааҕыт туолар кыахтаах. Ол наадатыгар, сарсыҥҥы күнү үөрэ күүтүҥ, тулалыыр дьону кытта сыһыаны тупсарыҥ. Дьон көмө көрдөстөҕүнэ – батынымаҥ. Оҥоһуллубут үтүө дьыала хас да бүк улаатан төннүө. Доҕотторуҥ көрсүһүүгэ ыҥырдахтарына -- хайаан да бар. Ол көрсүһүү эйиэхэ наһаа үтүө дьайыыланыа, туһалыа. Бу – дьиэ кэргэн иһигэр сыһыаны тупсарарга эмиэ бэртээхэй кэм.
Скорпион
Тулалыыр дьоҥҥут ортотугар букатын улуутуйан, тупсан, кэрэтийэн көстүөххүт. Бары эйигин “үчүгэй да киһи!” дии саныыллар. Холобур, салалтаҥ эн дуоһунаскын үрдэтиэн баҕарыа, кэрэ-күүстээх аҥаардар болҕомтолоро эмиэ улаатыа. Быһата, карьераҕа улахан үүнүү-сайдыы күүтэр. Сулумах скорпионнар ханнык эрэ улахан тэрээһиҥҥэ сылдьан сүрэхтэрин аҥаарын булан ылыахтарын сөп.
Охчут
Ханна эрэ ыраах баҕайы айаҥҥа барыаххытын баҕараҕыт. Туох да баайбат-тардыбат буоллаҕына, үөрэ-көтө баран хаалыҥ. Бу – айанныырга, саҥаны билэргэ-көрөргө, ханнык эрэ сылаас муора кытылыгар тиийэн саҥа “романы” хачыгыратарга үчүгэй кэм. Өскөтүн эн үөрэнэр буоллаххына, үөрэх матырыйаала барыта наһаа чэпчэки буолан көстүө. Өйүҥ аһара чөллөрүйэн, сытыырхайан сылдьар кэмэ.
Чубуку
Аттыгар баар дьонуҥ улахан истириэскэ түбэһиэхтэрэ, оттон эн “ууттан кураанах” тахсыаҥ. Ол долгуйуу эйигин улаханнык хаарыйыа суоҕа эрээри, мэлдьи сэрэх-сэргэх сырыт. Ордук – массыынаттан, айантан. Дууһаҥ, сүрэҕиҥ тапталга баҕарар. Таптаһар киһилээх буоллаххына, сыһыаҥҥыт тупсан, чэчирээн кэлэрэ сылыктанар. Бу нэдиэлэҕэ кыратык да саараабакка-долгуйбакка иэс, кирэдьиит харчы ылыахха да, биэриэххэ сөп.
Күрүлгэн
Ыал күрүлгэннэр истэригэр сыһыан бөҕөргүө, тупсуо. Эйигин тулалыыр сиэрэй, сыппах дьоҥҥо тэҥнээн көрө-көрөҕүн, “мин киһим үчүгэй да эбит” дии саныаҕыҥ. Чэ, быһата, дьиэ кэргэн иһигэр толору өйдөһүү, сөп түбэсиһии күүтэр. Онон сибээстээн, урукку-хойукку өйдөһүспэт суоллары барытын эйэ дэмнээхтик быһааран кэбиһиэххитин сөп. Туох эрэ үөрүүлээх тэрээһиҥҥэ ыҥырык кэллэҕинэ – хайаан да барыҥ.
Балыктар
Тулаҕытын барытын сааһылыаххытын, бэрээдэктиэххитин, сууйуоххутун-сотуоххутун, өтүүктүөххүтүн баҕараҕыт. Ону оҥордоххутуна, киһи сөҕүөн иһин, дууһаҕыт муҥутуур улахан дуоһуйууну ылыа. Доруобуйаҕыт эмиэ тупсан кэлиэ. Тулаҕыт төһөнөн сааһылаах-бэрээдэктээх да, настарыанньаҥ өссө тупсуо, көнүө. Быһата, айымньылаах үлэни толорорго табыгастаах күн-дьыл. Доруобуйаҕытын көрүнүҥ.
