Хамсык ыарыы аан дойду үрдүнэн өрө туруута элбээбит. Онон, кылгастык туох буола турарын билсиэххэ.
Кытай: Пекин куорат бырабыыталыстыбата куоракка киирэр дьон ахсаанын хонтуруоллуурун туһунан быһаарыныы ылыммыт. Онон, күҥҥэ 500-тэн элбэҕэ суох киһи киириэхтээх.
Словакия: алтынньы 12 күнүттэн үөрэх кыһалара дистанционнай формакка көспүттэр. Оттон алтынньы 15 күнүттэн саҕалаан уопсастыбаннай тэрээһиннэр ыытыллаллара бобуллар. Профессинальнай успуорт күрэхтэһиилэрэ буолаллар, ол эрээри күрэхтэһииигэ көрөөччүлэр киирэллэрэ көҥүллэммэт.
Украина: хамсык ыарыыга ыалдьыбыт киһи элбээбитинэн сибээстээн, хонтуруол кытааппыт. Үөрэх кыһалара барыта дистанционнай үөрэниигэ көспүт. Элбэх ыарыылаах эрэгийиэннэргэ общепиттары 22:00 чааска эрэ диэри үлэлииллэригэр соруйбуттар.
Чехия: икки нэдиэлэ устатыгар 100-тэн тахса тыһ. киһи ыалдьыбытынан, миэрэлэрин кытаатыннаралларыгар тиийбиттэр. Атыы-эргиэн кииннэригэр ыччат мустубатын туһуттан, босхо интэриниэти араарарга күһэллибиттэр. Эрэстэрээннэр, бардар киэһэ 20:00 чаас кэннэ үлэлииллэрэ бобуллар. Премьер-миниистирдэрэ Андрей Бабиш эрэстэрээн салайааччыларыгар арыгы атыылаабаттарыгар соруйбут.
Англия: хамсык ыарыы өрө туруута хоту эрэгийиэннэригэр тарҕаммытын биллэрэллэр. Премьер-миниистир Борис Джонсон 3 таһымнаах хонтуруолу ылалларыгар соруйбут. Ол курдук, намыһах ыарыылаах сирдэргэ: алтаттан элбх киһи мустуо суохтаах, эрэстэрээннэр уонна бардар 22:00 чааска сабыллыахтаахтар. Элбэх ыарыылаах сирдэр: дьиэҕэ туора дьону муһары боболлор, алтаттан ордук киһи мустубатын кытаанахтык хонтуруоллууллар. Онтон хамсык ыарыы олус элбээбит эрэгийиэннэригэр кэлиини-барыыны кэтииллэр, дьон мустарын хонтуруоллууллар, аһы атыылаабат бардар сабыллаллар. Бу маннык хонтуруол киирбит гынан баран, ол оннугар розничнай маҕаһыыннар, оскуолалар, университеттар үлэлээбиттэрин курдук үлэлии тураллар.
Иран: хамсык ыарыыга ыларбыт киһи ахсааана мөлүйүөн аҥарыттан ордук буолбут. Бу ааспыт сууккаҕа 3800-тан элбэх киһи ыалдьыбытын биллэрэллэр. Онон, уопсастыбаннай сиргэ мааската суох сылдьар уонна доруобуйатын туруга соччото суох эрээри дьиэтиттэн тахсыбыт дьону ыстырааптыыллар.
