Бу түбэлтэ 1970-с сс. бүтүүлэригэр, этэргэ дылы, абааһыны, иччини итэҕэйбэт кэмҥэ буолбута.
Үрүҥ тунах ыһыахтар бүтэннэр, от үлэтин күүрээннээх күннэрэ саҕаламмыттара. Бөһүөлэктэн тэйиччи сытар үрэххэ оскуола оҕолорун звенота тэриллэн, оттуу тахсыбыта. Салайааччынан бас-баттах тыллаах эдэрчи киһини анаабыттара.
Бастакы күннэригэр оттуур тэриллэрин, ол-бу малларын-салларын оннуларын буллартаан, иһэр ууну, оттор маһы бэлэмнээн, киэһэ аһылыгы аһаары олорбуттар. Салайааччылара оҕолор баалларыттан туттуммакка, арыгы таһааран испит. Оҕолортон хайалара эрэ «уоккун» диэн көрбүтүн: «Уот маһы сиир, аһы аһаабат, арыгыны испэт», – диэн саҥардыбатах даҕаны. Онтон сарсыныгар туох эрэ суһал наада тирээн, бөһүөлэктээн хаалбыта.
Арай ол киэһэ оҕолор бэйэлэрэ эрэ хаалан остуол тула кэпсэтэ олордохторуна, таһырдьа мас хайытар тыас иһиллибит. Бастаан утаа «бачча киэһэ хайабыт тахсан мастаан эрэр» диэх курдук санаан иһэн, бары дьиэ иһигэр баалларыттан, сирэй-сирэйдэрин көрсүбүттэр. Ол икки ардыгар били «масчыт» дьиэлэрин иччитэх турар салҕааһыныгар мас көтөҕөн киллэрэн «харк» гына бырахпыт. Хаста да кырыммыт уонна сүтэн хаалбыт. Аны, ол сылдьан, таһырдьа турар кыраапканы таарыйан кылырҕатар эбит. Оҕолор чахчы улаханнык куттаммыттар, чүмэчилэрин умуруорбакка хоммуттар.
Сарсыарда оҕолоро куттаммыттара ааһан, күлэ-үөрэ били дьиэни киирэн көрбүттэрэ – туох да суох. Тэлгэһэҕэ мас мастаммыт сибикитэ эмиэ биллибэт.
Эбиэт саҕана салайааччылара кэлбитигэр бөлүүҥҥү түбэлтэни кэпсииллэр. Киһилэрэ бастаан итэҕэйбэт эрээри, оҕолор сирэйдэрин-харахтарын көрөн, иһигэр: «Кырдьык, туох эрэ дьиибэлээбит дуу, хайа үөдэн», – дии саныыр. Хойутаан да буоллар уот оттон аһатар.
Ол күн оҕолор эмиэ түүҥҥэ диэри били тыаһы иһиллээбиттэр даҕаны, онтон ыла туох да биллибэтэх.
Харах УОТА.
