Арассыыйа Федерациятын бэрэсидьиэнэ Владимир Путин Арассыыйа сэттэ эрэгийиэниттэн элбэх оҕолоох дьиэ кэргэҥҥэ «Төрөппүт албан аата» («Родительская слава») уордьанынан наҕараадалыыр туһунан уураахха илии баттаабыт.
«Төрөппүт албан аата» уордьанынан уонна уордьан мэтээлинэн Саха сириттэн Игнатьевтар дьиэ кэргэн, маны сэргэ, Кировскай уобаластан Максим Лопатин уонна Снежана Рожкова наҕараадаланнылар.
Владимир Путин эрдэ «Төрөппүт албан аата» мэтээли ылар дьиэ кэргэҥҥэ биир төгүллээх 200 тыһ. солкуобай төлөбүрү, оттон уордьанын ылбыттарга 500 тыһ. солкуобайы аныыр туһунан этиини киллэрэ сылдьыбыта.
«Төрөппүт албан аата» уордьанынан сэттэ, эбэтэр онтон элбэх оҕону иитэр эбэтэр ииппит дьиэ кэргэн наҕараадаланаллар. Маннык наҕараада дьиэ кэргэн инстутутун уонна оҕону иитиини тупсарар туһуттан, 2008 сыллаахха ыам ыйын 13 күнүгэр олоххо киирбитэ.
Наҕараадаҕа тиксибит Кристина уонна Михаил Игнатьевтар дьиэ кэргэннэрэ Таатта улууһун Кыйыы нэһилиэгэр олороллор. Кинилэр бааһынай хаһаайыстыбалаахтар, 10 оҕону иитэллэр – 3 уолу уонна 7 кыыһы.
