2020 сыл тохсунньу 1 күнүттэн Саха сиригэр саҥа төрөөбүт оҕо иһин төлөбүр улаатыаҕа. Бу туһунан СИАҕа өрөспүүбүлүкэ һлэҕэ уонна социальнай сайдыыга министиэристибэтэ иһитиннэрбит.
Айсен Николаев уурааҕынан, сыл саҥатыттан оҕо төрөөтөҕүнэ бэриллэр төлөбүргэ эбии миэрэлэргэ уларытыылары киллэриэхтэрэ.
Ол курдук, бастакы оҕоҕо тииһинэн олоруу кээмэйин икки төгүл биир кэмнээх төлөбүр оҥоһуллуоҕа (36 322 солк.). Маны таһынан, бастакы оҕо төрөөтөҕүнэ (эбэтэр иитэ ыллахтарына) наадыйар ыалга бэриллэр ыйдааҕы босуобуйа болдьоҕо уһаан биэрэр. Инньэ гынан, төлөбүр оҕо үһүгэр дылы бэриллэр буолуоҕа. Министиэристибэҕэ биллэрбиттэринэн, билигин балтараатыгар дылы төлөбүрү ыла олорбут наадыйар ыаллар аны оҕо үһүгэр дылы ыларын курдук хаттаан оҥотторуохтарын сөп.
Маны сэргэ, эһиилгиттэн иккис оҕо иһин эрэгийиэннээҕи Ийэ хапытаала 139 985 солк. тэҥнэһиэҕэ (ити федеральнай Ийэ хапытаалын (466 617) отут бырыһыана).
Үһүс уонна онтон кэлэр оҕо иһин үһүгэр дылы төлөнөр ыйдааҕы төлөбүр эмиэ улаатар – 17 660 солк. буолар. Маныаха дьиэ кэргэн дохуота өрөспүүбүлүкэ нэһилиэнньэтин биир киһиэхэ тиксэр дохуотунааҕар кыра буолуохтаах.
