СӨ Үлэҕэ уонна социальнай сайдыыга министиэристибэтэ оҕолоох ыалга туох көмө баарын туһунан иһитиннэрэр.
Оҕолоох ыал хоруона хамсыгынан сибээстээн көрүллэр төлөбүрү таһынан “Финансовая поддержка семей при рождении детей” өрөспүүбүлүкэтээҕи бырайыак чэрчитинэн социальнай көмөнү ылыан сөп. Ол курдук, бастакы оҕо төрөөтөҕүнэ (иитэ ыллахха) биир кэмнээх 35 320 солк. төлөнөр, ый аайы 17 660 солк. кэлэр буолар.
Иккис оҕо төрөөтөҕүнэ (иитэ ыллахха) өрөспүүбүлүкэтээҕи ийэ хапытаалын (федеральнай ийэ хапытаалын 30 %-гар тэҥнэһэр суумалаах) ылар кыах үөскүүр. Аны туран, өскөтүн иккис оҕо 2020 сыл тохсунньу 1 күнүн кэннэ төрөөбүт (иитэ ылыллыбыт) буоллаҕына, ийэ хапытаала 184 985,1 солк. буолар.
Үһүс уонна онтон кэлэр оҕоҕо ый аайы 17 660 солк. төлөнүөхтээх.
Оҕолоох ыалга көмө харчынан эрэ муҥурдаммат. Итини таһынан өрөспүүбүлүкэбитигэр демографияны тупсарарга туһуламмыт маннык көмө хайысхалара бааллар:
-- иккис эбэтэр онтон кэлэр оҕолорун 2019 сыл тохсунньу 1 күнүн кэннэ төрөппүт ыаллар, өскөтүн кинилэр Уһук Илин эрэгийиэнигэр олорор буоллахтарына, 5 %-наах ипотека кирэдьиитин туһаныахтарын сөп. Бу көмө 2022 сыл бүтүөр диэри үлэлиир;
-- үһүс эбэтэр онтон кэлэр оҕолорун 2019 сыл тохсунньу 1 күнүн кэннэ төрөппүт ыаллар ипотекаларын кирэдьиитин сабалларыгар 450 000 солк. (диэри) көрүллэр;
-- Уһук Илин эрэгийиэнигэр олорор, сокуоннай саастарын туола илик оҕолордоох, 35-тэрин аннынан саастаах эдэр ыаллар 2 %-наах “Уһук Илин ипотекатын” туһаныахтарын эбэтэр “биир гектары” ылбыт дьон, ол гектардарыгар чааһынай дьиэ туттарга ипотека кирэдьиитин ылыахтарын сөп. Ити бырагыраама 2024 сыл ахсынньы 31 күнүгэр диэри үлэлиир.
Сиһилии социальнай харалта управлениеларыттан билсиэххэ сөп.
