Үлэ уонна социальнай сайдыы министиэристибэтэ “Сыл бастыҥ ыала – 2020” өрөспүүбүлүкэтээҕи көрүү-күрэх түмүгүн анал хамыыһыйа таһаарбытын туһунан иһитиннэрэр.
32 улуустан 86 ыал кыттыыны ылбыт. Кинилэр 5 куонкуруска кэтэхтэн уонна дистанционнай ньыманнан илин-кэлин түһүспүттэр. Сыл ахсын кыттааччы ахсаана улаатарын бэлиэтииллэр. Дьүүллүүр сүбэ кыттааччылар портфолиоларын, визитнэй карточкаларын уонна кинилэр улуус уопсастыбаннай олоҕор кыттыыларын сыаналаабыт.
“Эдэр ыал” номинацияҕа 35 саастарыгар дылы 26 эдэр ыал кыттыыны ылбыт. Онно кыайыылааҕынан Томпо улууһуттан Ирина уонна Валентина Гороховтар тахсыбыттар. “Элбэх оҕолоох дьиэ кэргэн” номинацияҕа 21 ыал кыттыбыт. Кыайыылааҕынан Ньурба улууһуттан Дина уонна Сергей Егоровтар ааттаммыттар. “Тыа ыала” номинацияҕа 20 дьиэ кэрэг сайаапканы биэрбититтэн, кыайыылааҕынан Горнайтан Сайыына уонна Сергей Илюхиннар буолбуттар. “Дьиэ кэрэгэн – үгэһи утумнааччы” номинацияҕа кыайыылааҕынан Чурапчы улууһуттан Акулина уонна Иван Ануфриевтар, “Көс ыал” номинацияҕа – Анаабыр улууһуттан Анна уонна Анатолий Поповтар (8 ыал кыттыбыт) ааттаммыттар. Бу ыаллар бары “Семья года” Бүтүн Арассыыйатааҕы күрэххэ кыттар чиэстэммиттэр.
