Төрөөбүт тыл – норуот барҕа баайа, кэлэр кэскилэ. Төрүт тылбыт симэлийэн сүтэн хаалбатын туһугар кэнчээри ыччаппытын сахалыы өйгө-санааҕа иитэр, саха кутун-сүрүн иҥэрэр хас биирдиибит ытык иэһэ. Саха Өрөспүүбүлүкэтин Национальнай бибилэтиэкэтин Оҕо ааҕыытын киинэ Төрөөбүт тыл уонна сурук–бичик күнүгэр аналлаах Ийэ тылбыт эйгэтин кэҥэтэр, сайыннарар сыаллаах-соруктаах сонун тэрээһиннэри тэрийдэ.
Кэнники кэмҥэ өрөспүүбүлүкэбитигэр төрөөбүт тылы сыыппара эйгэтигэр киллэрии хайысхатыгар улахан болҕомто ууруллар. Ол курдук, билигин Сахалыы Бикипиэдьийэ матырыйаалларын үгүс ааҕааччы сөбүлээн туттар, туһанар. Олунньу ый 10 күнүгэр төрөппүт, «Киберсаха түмсүү» салайааччыта, Саха Бикипиэдьийэ дьаһабыла, быраас, лингвист Николай Николаевич Павлов-Халан кыттыылаах «Төрөппүт, оҕо уонна Бикипиэдьийэ» Zoom анал сыһыарыы нөҥүө кэпсэтии буолла. Кэпсэтии сүрүн ис хоһооно — үөрэнээччи сахалыы үөрэҕи сайыннарар интэриниэт ситимиттэн - Бикипиэдьийэттэн туһааннаах информацияны, билиини дѳбѳҥнүк булан, үѳрэҕэр, чинчийэр, айар үлэтигэр кѳдьүүстээхтик туһанар буолуута.
СӨ үөрэҕэриитин туйгунун, «Күннүк» ааптарын Александр Герасимовы кытта олунньу ый 11 күнүгэр «Айылҕаны күннэтэ кэтээн көрүү» күннүгүн тула бэрт интэриэһинэй, туһалаах кэпсэтии буолан ааста. Маргарита Афанасьевна уонна Александр Августович Герасимовтар 2016 сыллаахтан күн-дьыл, көтөр-сүүрэр туругун бэлиэтиир сахалыы уонна нууччалыы тылынан өбүгэлэрбит билгэлэрин, күн-дьыл туругун, салгын баттааһынын, сөҥүү түһүүтүн, тыал хайысхатын о.д.а. айылҕа көстүүлэрин күннэтэ кэтээн көрөннөр, “Күннүк” оҥорон таһаараллар. Сэргэх тэрээһин оҕону тулалыыр эйгэни кэтээн көрөргө, болҕомтолоох буоларга, тулалыыр айылҕаны харыстыырга иитэр-үөрэтэр суолталаах ыытылынна.
Олунньу ый 12 күнүгэр өрөспүүбүлүкэ оскуолаларын алын, орто сүһүөх 3 — 8 кылаастарын үөрэнээччилэригэр үгэскэ кубулуйбут «Таптыыр сахам тылынан…» өрөспүүбүлүкэтээҕи аахсыйа үрдүк таһымнаахтык ааста. Аахсыйа урут алын сүһүөх кылаас оҕолорун эрэ хабар эбит буоллаҕына, былырыыҥҥыттан орто сүһүөх кылаастарыгар эмиэ ыытыллар буолла. Бырайыак сүрүн сыала: үөрэнээччилэр саха тылыгар уонна литэрэтиирэтигэр билиилэрин таһымын үрдэтии, уус-ураннык ааҕыыны уонна таба суруйар дьоҕурдарын сайыннарыы, кыраайы үөрэтэр литэрэтиирэни уонна бэчээккэ тахсар матырыйаалы ааҕа, туһана үөрэтии.
«Дьиэ кэргэҥҥэ оҕону сахалыы иитии» диэн тиэмэҕэ Инстаграм ситим быһа эфирыгар оҕолорун хас да омук тылынан тэҥҥэ иитэр ураты көрүүлээх эдэр ийэни - Айталина Романованы кытта истиҥ сэһэргэһии буолла. Билигин виртуальнай эйгэ күннээҕи олохпутугар ааҥнаан киирбит кэмигэр, төрөөбүт тылынан иитии-үөрэтии ордук дьиэ кэргэнтэн тутулуктааҕын умнуо суохтаахпыт. Оҕо төрөөбүт тылынан саҥарар, төрүт култууратын ытыктыыр буоллаҕына үйэлээҕи-кэскиллээҕи айар, үтүө сиэрдээх-майгылаах, сөптөөх толкуйдаах, кыра да түгэҥҥэ мөлтөөн-ахсаан биэрбэт буола улаатар.
Иванна Бурцева.
