Саха сиригэр киһи быраабыгар боломуочуйалаах Сардаана Гурьева хас биирдии иһитиннэриигэ болҕомтолоохтук сыһыаннаһан ылсан үлэлиир. Бу сырыыга кини “Кыым” көрдөһүүтүн быһа гыммакка, элбэх оҕолоох дьиэ кэргэҥҥэ тахса сырытта. Ити туһунан кини инстаграмҥа @sardanagurieva баар сирэйигэр суруйбут:
“Миэхэ соторутааҕыта “КЫЫМ” хаһыат суруналыыһа Саргылаана БАГЫНАНОВА, Өктөм нэһилиэгэр олорор 9 оҕолоох дьиэ кэргэттэр олорор балаһыанньаларыгар көмөлөһөрбөр көрдөһөн сибээскэ тахса сылдьыбыта. Бу дьиэ кэргэн иитэр оҕолорун улахан ахсаана “приемнайдар”.
Кулун тутар 15 күнүгэр бу дьиэ кэргэҥҥэ тахса сырыттым.
Төрөппүттэр нэһилиэк, улуус, маны сэргэ өрөспүүбүлүкэ ыытар уопсастыбаннай олоҕор кытталлар. Оҕолор бары олус көхтөөхтөр, билиигэ-көрүүгэ тардыһыылаахтар, үүнэргэ-сайдарга баҕалаахтар. Кинилэр араас бырайыактары суруйаллар уонна ону олоххо киллэрэргэ дьулуһаллар эбит. Ол курдук, араас дьиэ көтөрдөрүн, куруолуктары иитэллэр, үүнээйи олордуутунан дьарыктаналлар, маны сэргэ мыыла буһарыытынан, араас оттору булкуйан тигээйи буоскатыттан эко-чүмэчилэри оҥорор интэриэһинэй дьарыктаахтар.
Маны тэҥэ, ыҥырыа иитиитинэн, мутукча туорааҕыттан мүөт бэлэмнииллэр, араас үүнээйини, уулаах отону хомуйаллар.
Төрөппүттэр этэллэринэн, оҕолор дьарыктаах буолалларыгар, салгыы сайдалларыгар улахан киэҥ-куоҥ дьиэ туттар баҕа санаалаахтар. Ол эрэн, баҕа санааларын олоххо киллэрэллэрэ кыаллыбат. Төрөппүттэр дохуоттара кыратынан, баан ирдэбилинэн, ипотеканан кирэдьиит ылар кыахтара суох. Маны сэргэ биир даҕаны судаарыстыба оҥорор бырагырааматыгар кыайан хапсыбаттар.
“Инникитин улахан дьиэ туттарбыт буоллар, дьарыкпытын кэҥэтиэ этибит. Ол туһуттан дьиэ кэргэн чэбидигирдэр агроусадьбатын тэриниэхпитин баҕарабыт”, - диэн төрөппүттэр санааларын үллэстэллэр.
Мин ыҥырыыбынан Хаҥалас улууһун баһылыга Олег Иринеев уонна Өктөм нэһилиэгин баһылыга Александр Большаков бу ыалга тэҥҥэ сылдьыстылар. Дьиэ кэргэн олорор усулуобуйатын тупсарыыны уонна кинилэр социальнай суолталаах бырайыактарын олоххо хайдах киллэрэри дьүүллэстибит”.
