Аҕа уонна уол оҕо күнүн, Саха АССР төрүттэммитэ 100 сылын чэрчитинэн, Чурапчы улууһун Сылаҥ нэһилиэгэр XXII-с Бүтүн өрөспүүбүлүкэтээҕи “Аҕа күрэҕэ” күөн күрэс буолан ааста.
Барыта 17 хамаанда кыттыыны ылла. Күрэх олус сытыы, тыҥааһыннаах буолла. Күрэххэ кыттааччы аҕа уонна уол оҕо бэйэлэрин айымньылаахтык билиһиннэрдилэр, 7 көрүҥ тургутан көрүү күрэхтэрин аастылар.
“Аҕа күрэҕэ” күөн күрэс үөрүүлээх сабыллыытыгар улуус Аҕа баһылыга Степан Саргыдаев, СӨ “Аҕаларын лигатын” бэрэссэдээтэлэ Айхал Габышев, СӨ Үлэҕэ уонна нэһилиэнньэ үлэлээх буолуутун миниистирин солбуйааччы Афанасий Постников, Сылаҥ нэһилиэгин баһылыга Егор Сивцев, улуус баһылыгын социальнай боппуруостарга солбуйааччы Мария Кронникова, Чурапчы нэһилиэгин баһылыга Владимир Сивцев кыттыыны ыллылар.
Уопсай түмүккэ, 1 миэстэ уонна квадроцикл хаһаайынынан Таатта улууһун Туора Күөл нэһилиэгин олохтоохторо, Дьүлэйдэээҕи ОДьКХ сыбаарсыга, нэһилиэк аҕаларын «Дохсун» эр дьон ансаамбылын түмсүүлэрин салайааччыта, нэһилиэк дьокутаата, нэһилиэк муҥхатын салаайыччаларыттан биирдэстэрэ Петр Чупров уолунаан Арсенныын буоллулар! Онон, кинилэр эһиилги “Аҕа күрэҕэ” Таатта улууһугар ыытылларын ситистилэр.
Иккис миэстэ уонна “Регулмото” матассыыкыл хаһаайыннарынан былырыыҥҥы өрөспүүбүлүкэтээҕи “Аҕа күрэҕин” призердара, Болтоҥо нэһилиэгиттэн Яков Кривошапкин уолунаан Михаиллыын буоллулар. Кинилэргэ Айхал Иванович дьиэ кэргэнин аатыттан анал “СКС”-саа сэртипикээтэ туттарылынна.
Онтон үһүс миэстэ уонна Чурапчы улууһун дьаһалтатын убаһаны ылыыга сэртипикээтинэн Дьокуускай куораттан Александр Винокуров уолунаан Арсенныын наҕараадаланнылар.
Туһаныллыбыт сигэ: https://xn--80aa7aggbp2b.xn--p1ai/article/49182
