От ыйын 8-с күнүгэр Бүтүн Арассыыйатааҕы дьиэ кэргэн, таптал уонна бэриниилээх буолуу күнэ бэлиэтэнэр. Ол чэрчитинэн, Дьокуускайга дьиэ кэргэн бэстибээлэ уонна аан бастакы дьиэ кэргэнинэн күргүөм хаамыы буолуоҕа.
Бу күн 16:00 чаастан киин куорат Киров уулуссатын устун, Судаарыстыбаннай циркэ аттыттан саҕалаан Хомсомуол болуоссатыгар диэри, саҥардыы ыал пааралар сыбаайба таҥаһын таҥнан, элбэх оҕолоох ыаллар, Аҕалар уонна уолаттар, «үрүҥ көмүс» волонтердар лигалара, «Көхтөөх уһун үйэлэнии» кулууп кыттыылаахтара,үлэ кэллэктииптэрэ уонна көҥүл түмсүүлэр хаамыахтара.
Ону сэргэ, Култуура уонна сынньалаҥ пааркатыгар, Хомсомуол болуоссатыгар киэһэ 19:00 чааска диэри быыстапкалар, маастар-кылаастар үс хайысханан ыытыллыахтара. «Чөл олох түөлбэтэ» хайысханан быраастар үлэлиэхтэрэ, зумбаҕа, фитнескэ, ушуга, хаалыктаах хаамыыга, сөпкө аһыырга маастар-кылаастары тэрийиэхтэрэ.
«Оҕо саас түөлбэтэ» хайысханан оҕолорго маастар-кылаастар, аквагримҥэ, оригамига акварелинэн уонна асфалька уруһуйга күрэстэр буолуохтара. Ону таһынан, оҕолору хип-хоп уонна брейк-данс үҥкүүлүүргэ үөрэтиэхтэрэ.
Саамай элбэх тэрээһиннээх хайысханан «Көхтөөх уһун үйэлэнии» былаһаакката буолуоҕа. Манна кэлбит дьон иискэ-ууска, уруһуйга маастар кылаастарга, чэбдигирдэр дьарыктарга, үҥкүүгэ уонна оһуохайга сылдьыахтара. Өссө 55+ саастаах кэрэ аҥаардар «Ситэ Кэрэ» модельнай устуудьуйаҕа кастинг ааһыахтара.
Дьиэ кэргэн бэстибээлин чэрчитинэн, эдэр ыаллар тапталга билиниигэ уонна оҕо кэлээскэтин киэргэтиигэ күрэстэһиэхтэрэ. Кыайыылаахтары Саха сирин кэрэ муннуктарыгар сынньана барар путевкаларынан наҕараадалыахтара.
Киэһэ 17:00 чаастан Хомсомуол болуоссатыгар эстрада сулустара кыттыылаах бырааһынньыктааҕы кэнсиэр буолуоҕа.
Күрэстэргэ хайдах кыттар туһунан СӨ Үлэҕэ уонна социальнай сайдыыга министиэристибэтин саайтыгар уонна телеграм-ханаалыгар билсиэххитин сөп.
