Саха сириттэн төрүттээх билигин АХШ Лос-Анджелес куоракка олорор Елена Корнилова, “Brother`s keeper” (“Хранитель братьев”) диэн криминальнай драмаҕа уһулунна.
Киинэ сүрэхтэниитэ бу ый 24 күнүгэр Лос-Анджелеска буолар. Режиссер Андре Джефферсон. Киинэҕэ икки иитиэх бырааттыы уолаттар олохторо көстөр. Кинилэр психологическай ыарыылаахтар, алҕас ийэлэрин өлөрөн кэбиһэллэр.
Оттон Елена Шай диэн уруккута арыгыһыт дьахтары оонньообут.
“Кыра оруол эрээри олус интэриэһинэй. Шай уруккута арыгыһыт, олус кыһалҕалаах кыыс. Кини кэлин көнө суолга үктэнэр. Оруолум төһө да сүрүн оруол буолбатар, элбэх көрдөөх түгэннэрдээх этэ. Ордук сүрүн дьоруойу кытта оонньообуппун өйдөөн хаалбыппын”, — диэн Елена кэпсиир.
Елена Корнилова Ленскэйтэн төрүттээх, онно улааппыт. Оскуоланы бүтэрэн баран Москубаҕа МГУ суруналыыстыка факультетын бүтэрбит. 2014 сыллаахтан Лос-Анджелес куоракка олорор. Онно Санта-Моникаҕа тыйаатыр иһинэн актерскай оскуоланы бүтэрбит. Уопсайа 27 киинэҕэ уһуллубут. Олор истэригэр “Fighting shadows”, “Red Velvet”, “Reel”. Елена английскай, немецкэй уонна испанскай тылынан холкутук саҥарар.
“Brother`s keeper” киинэ Арассыыйаҕа хаһан көстөрө биллибэт. Оттон Елена дойдутугар бу ый бүтүүтэ кэлэр. Кини Москубатааҕы киинэ бэстибээлигэр дьүүллүүр сүбэҕэ үлэлиэхтээх.
