Халыматтан төрүттээх Алена Акакиева — ХИФУ физическэй култуура уонна спорт институтун устудьуона. Кини билигин Красноярск куоракка ыытылла турар Кыһыҥҥы универсиадаҕа волонтерунан талыллан, үлэлии сылдьар.
Алена — Алаһыай орто оскуолатын выпускнига. Оскуолаҕа туйгун үөрэнээччи буолан, кыһыл мэтээлинэн бүтэрбитэ. Ыллыырын, спордунан дьарыктанарын сөбүлүүр. Бастакы үөрэҕин И.И.Фадеев аатынан финансовай-экономическай колледжка үөрэнэн, экономист-бухгалтер идэтин баһылаабыта. Онтон билигин ХИФУ физическэй култуура уонна спорт институтугар устудьуоннуур. «INFINITY» устудьуоннар педагогическай этэрээттэригэр үһүс сылын үлэлээн, оҕолорго араас коммунарскай сбор, куурустары ыытыһар, улуустарынан сылдьыһар. Сайыҥҥы өттүгэр лааҕырга үлэлиир.
Маны тэҥэ Алена волонтердары кытта үлэлиир өрөспүүбүлүкэтээҕи Кииҥҥэ баар. Дьокуускай куоракка аҕа саастаах дьоҥҥо көмөлөһөртөн саҕалаан, норуоттар икки ардыларынааҕы араас күрэстэргэ тиийэ үлэлиир. Кини ХИФУ волонтердарын штабыгар киирэргэ күһүн кастинг-кэпсэтии ааспыт. Уопсайа 33 оҕо тиксибит. «Устудьуоннар Аан дойдутааҕы Кыһыҥҥы универсиадаларыгар волонтерунан талылларга сайтка регистрацияламмытым. Аҕыйах кэминэн үөрэх саҕаламмыта. Кыһын skype нөҥүө кэпсэтии ааспытым. Онно омук тылын төһө билэрбин, үлэм уопутун, тоҕо волонтер буолуохпун, универсиада кэмигэр ханнык хайысхаҕа үлэлиэхпин баҕарарбын ыйыппыттара», — диэн Алена кэпсээтэ.
Красноярск куоракка Кыһыҥҥы универсиадаҕа ХИФУ штабыттан волонтерунан үлэлииргэ 10 устудьуон хабыллыбыт. Кинилэр истэригэр Алена Халыматтан соҕотох. Үлэлэрэ олунньу 23 күнүттэн саҕаланан, кулун тутар 14 күнүгэр түмүктэниэхтээх. «Биһигини Сибиирдээҕи федеральнай университет саҥа уопсайыгар түһэрдилэр. Остолобуойга күҥҥэ үстэ аһаталлар. Олоруубутун, аһылыкпытын универсиада хааччыйар. Кэлэр-барар айаммытын ХИФУ уйунар», — диэтэ Алена. Билигин кини универсиадаҕа спортивнай информационнай Кииҥҥэ хайыһар, спортивнай ориентирование уонна биатлон стойкатыгар үлэлии сылдьар. Спортсменнар, тренердэр, дэлэгээссийэ салайааччылара, кыттааччылар Аленаттан күрэх, дьарык, тырааныспар бириэмэтин кэлэн ыйытылаһаллар, боротокуоллары ылаллар.
Алена үөрэҕин таһынан, мас тардыһыынан уонна волейболунан дьарыктанар. Инникитин олоҕун спорду кытта ситимниэн баҕарар. Тренер биитэр инструктор буоларыгар кыһаллан үөрэнэ сылдьар.
Римма Ноговицына, ulusmedia
