Бүгүн ИДьМ Саха сиринээҕи салаатын кэллиэгийэтин саалатыгар, Дьокуускайдааҕы 31-с №-дээх оскуола 11 “б” кылааһын үөрэнээччитин Филипп Кириллины наҕараадалаатылар. Бу туһунан ИДьМ пресс-сулууспата иһитиннэрэр.
Санатар буоллахха, ыам ыйын 4 күнүгэр 31-с №-дээх оскуола таһыгар биир биллибэт киһи оскуолаҕа үөрэнэр кыыһы хаста да төбөҕө охсубут уонна суумкатын былдьаан баран куоппут. Бу түбэлтэни Филипп Кириллин көрөн, уһуну-киэҥи толкуйдуу барбакка буруйдааҕы эккирэтэн туппут уонна полицияҕа тыллаабыт. Полиция үлэһиттэрэ кэлиэхтэригэр диэри буруйдааҕы ыыппатах.
ИДьМ Саха сиринээҕи салаатын миниистирэ, полиция генерал-майора Владимир Прокопенко, Филипп Кириллины хорсун быһыытын иһин биэдэмистибэ махтал суругунан уонна илиигэ кэтиллэр чаһынан наҕараадалаата.
