Үөһээ Бүлүүтээҕи Д.С.Спиридонов аатынан 4 №-дээх оскуола 5 «б» кылааһыгар бэрт сэргэх уруок буолла. Арассыыйа салгын-десантнай чааһыгар сулууспалыы сылдьар Анатолий Александрович Ачикасов улаатан эрэр уолаттары кытта көрүстэ. Кыһыл болуоссакка Кыайыы параадыгар хайдах кыттыбытын, сүүмэрдээһини ааспытын туһунан кэпсээнин сэҥээрдилэр.
Үөһээ Бүлүү чаҕылхай ыччата Анатолий Ачикасов В.Ф.Маргелов аатынан Рязаннааҕы воздушнай-десантнай училищены кыһыл дипломунан бүтэрбитэ. Идэтийбит байыаннай үөрэхтээх эдэр киһи 5 «б» уолаттар кылаастарыгар «Эр киһи чиэһэ, ытык иэһэ уонна килбиэнэ» диэн тиэмэҕэ бэсиэдэни ыытта.
“Эһиги сааскытыгар десантник буолуохпун баҕарбытым уонна ону ситиһэр сыалтан бэлэмнэнэн барбытым”, – диэтэ Александр иһийэн истэ олорор уолаттарга. Кини оскуола сааһыттан иитэн-такайан таһаарбыт төрөппүттэрэ, уһуйааччылара Григорий Степанович Золотарёв, Михаил Васильевич Ан, Владимир Николаевич Николаев инники олоҕор, идэтин таларыгар сүдү оруоллаахтарын тоһоҕолоон бэлиэтээтэ.
Кыракый Толя оскуола сааһыттан Дүллүкүтээҕи парашютнай кулуупка аатырбыт уһуйааччы, энтузиаст-учуутал Владимир Николаевка эрчиллибит, десантник буоларга уустук үөрэтиини, такайыыны ааспыт. Ол дьоллоох кэмин туһунан сылаастык махтанан аҕынна.
Күөх береты ыларга зачету туттарбытын туһунан уолаттар ордук сэҥээрэн иһиттилэр. «ИЛ-76» сөмөлүөттэн түүҥҥү ыстаныы зачекка төһүү буоларын уолаттар биллилэр. Анатолий «никто, кроме нас» диэн этии өйдөбүлүн уол оҕоҕо тиийимтиэтик быһаарда. Ийэ дойдуну биһигиттэн, эһигиттэн ураты ким да көмүскээбэт, онуоха бэлэм буоларга дьулуһуҥ диэн эттэ.
Кыһыл болуоссакка Кыайыы параадыгар кыттыбытын, ол инниттэн сыл аҥаара эрчиллэллэрин, маныаха ураты тулуурдаах уолаттары сүүмэрдээн ылалларын кэпсээтэ. Анатолий Александрович гендернай 5 «б» кылаас үөрэнээччилэригэр байыаннай үөрэххэ кэлэллэригэр, онно анаан бэлэмнэнэллэригэр ыҥырда.
“Эр киһи тыҥыраҕын, бэйэтин таҥаһын, оронун анныттан саҕалаан тула өттүн дьаһанарыттан бэйэтин ииттиниитэ саҕаланар“, – диир кини. Анатолий: «Кылааскытын сууйаҕыт дуо?» – диэн ыйытыытыгар уолаттар барахсаттар: «Сууйабыт!» – диэн күргүөмүнэн эппиэттээтилэр. «Маладьыастар! Сууйартан кыбыстыа суохха наада. Киргэ олоруу – ол кыбыстыылаах!» диэн өйдөбүлү бэрт судургутук эрээри, умнуллубаттык тириэртэ.
Д.С.Спиридонов аатынан оскуола 5 «б» уолаттар кылаастарын салайааччыта Егор Васильевич Ильин:
– Анатолий Александрович түөрт көрүҥҥэ байыаннай киирсиигэ спорт маастарыгар кандидат. Анатолий кыра эрдэҕинэ харбыырга эрчиллэригэр биэрбит сүбэлэрбин өйдүү уонна тутуһа сылдьарын улаханнык долгуйа, үөрэ иһиттим. Уолаттарбар, патриотическай тыын өйдөбүлэ саҥа уһуктан эрэр дьонугар, Улуу Кыайыы күнүгэр аналлаах бары тэрээһиннэргэ көхтөөхтүк кыттыы ытыктабыллаах, хайҕаллаах быһыы буоларын өйдөттө. Бэрт олохтоох, сэргэх кылаас чааһа буолбутуттан бэйэм да астынным. Уолаттар инники олохторугар улахан сабыдыаллаах, бэрт туһалаах алтыһыы диэн бигэтик эрэнним.
Уолаттар ыйытыыларыгар киэҥ хоруйдары, олоххо туһалаах сүбэлэри ылан сүргэлэрэ көтөҕүлүннэ.
Галина Семенова, ulusmedia
