Ил Дархан Айсен Николаев сибээс уонна информационнай технология уобалаһыгар П.И. Дудкин аатынан СӨ судаарыстыбаннай бириэмийэтин Александр Борисов дьонугар туттарда. Александр Ильич СӨ бырабыыталыстыбатын бэрэссэдээтэлин солбуйааччынан, сибээс уонна информационнай технология миниистиринэн үлэлээбитэ. Кини ыам ыйын 8 күнүгэр олохтон барбыта.
Судаарыстыбаннай бириэмийэ дипломун, түөскэ анньылар бэлиэни уонна харчынан бириэмийэни кэргэнэ Александра Николаевна тутта. Тэрээһиҥҥэ Александр Ильич уола Илья кэргэнинээн, кыыһа Татьяна уонна сиэттэрэ, ону таһынан, бырабыыталыстыба салайааччылара, суруналыыстар сырыттылар.
Ил Дархан Александр Борисов дьиэ кэргэнигэр дириҥ кутурҕанын тиэртэ уонна Александр Ильичка судаарыстыбаннай бириэмийэ ананарын туһунан муус устар ыйга биллибитэ диэн эттэ. “Саха сиригэр сибээс уонна тэлэбиисэринэн, радионан биэрии сайдыытын устуоруйата бүтэһик 20 сыл Александр Борисовы кытта быһаччы сибээстээх. Ол курдук, улуустарга Интэриниэт, суотабай сибээс, бырабыыталыстыба үлэтигэр электроннай докумуон киирбитэ, цифровизация сайдыбыта. Кини курдук тэрийэр талааннаах киһи үлэлээбэтэҕэ буоллар, билигин цифровизация сайдыытын таһымынан бастакы күөҥҥэ сылдьарбыт саарбах”, – диэн бэлиэтээтэ. Ону таһынан, суруналыыс быһыытынан үлэтин – “Охота и рыбалка в Якутии” биэриитин сыаналаата.
Александра Николаевна дьиэ кэргэнин аатыттан Айсен Николаевка махтал тылын эттэ уонна кэргэнэ Александр Ильич судаарыстыбаннай бириэмийэ ылар буолбутун туһунан истэн олус үөрбүтүн кэпсээтэ. “Александр Ильич үлэтинэн олорбута, биһиги киниэхэ эрэллээх тыыл буоларга кыһалларбыт”, – диэн эттэ.
Сибээс уонна информационнай технология уобалаһыгар П.И. Дудкин аатынан СӨ судаарыстыбаннай бириэмийэтэ 2012 сылтан сибээс уонна информационнай технология сайдыытыгар уһулуччулаах кылаат иһин туттарыллар. Александр Борисов бириэмийэ ахсыс лауреата. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.
