Бэс ыйын 26 күнүгэр биология, информатика уонна ИКТ СКЭ түмүктэрэ билиннэ. Бу туһунан СӨ Үөрэххэ уонна билимҥэ министиэристибэтэ иһитиннэрэр.
Эксээмэн туттарбыт 971 оҕоттон Өрөспүүбүлүкэтээҕи лицей-интернат үөрэнээччитэ Мичил Егоров 100 баалы ылбыт. Мичил математиканы эмиэ 100 баалга туттарбыта.
“Эксээмэннэргэ биир эрэ сыл буолбакка, бу сыллар тухары күүскэ дьарыктаммытым. СКЭ-ҕэ улаханнык долгуйбатаҕым. Учууталларбар Илья Гаврильевич Кысылбаиковка, Айтал Викторович Дьяконовка улахан махталбын тиэрдэбин. Оҕолор эксээмэннэргэ билиҥҥэттэн бэлэмнэнэллэригэр уонна куттамматтарыгар баҕарабын”, – диэн Мичил баҕа санаатын тиэртэ. Кини программист буолуон баҕарар уонна Санкт-Петербурдааҕы национальнай-чинчийэр университетка туттарсар ыра санаалаах. Бүгүҥҥү күҥҥэ СКЭни 17 оҕо 100 баалга туттарбыт. Бу туһунан пресс-сулууспа иһитиннэрэр.