Күн-түүн ааспыт үйэ дьалхааннаах кэмнэрин көрсүбүт ытык кырдьаҕастарбыт аҕыйаан иһэллэр. Үгүстэрэ 100 саастарыгар тиийбэккэ орто дойдуттан бараллар. Оттон “Үйэ Сааска” тиийбиттэр дьоллоро үс төгүл үрдүүр. Бүгүн Уус Алдаҥҥа үөрүүлээх күн. Лөгөй нэһилиэгин бочуоттаах олохтооҕо Ульяна Петровна Пестрякова 100 сааһын туолла.
От ыйын 1-гы күнүгэр Лөгөй нэһилиэгин бочуоттаах олохтооҕо, үлэ уонна тыыл бэтэрээнэ Ульяна Петровна Пестрякова 100 сааһын томточчу туолла. Ульяна Петровна 100 сааһын көрсө Уус Алданнааҕы социальнай көмүскэл салалтата, улуус дьаһалтата, оройуон бэтэрээннэрин сэбиэтэ буолан Кэптэни бөһүөлэгэр тиийэн ытык кырдьаҕаһы эҕэрдэлээтилэр уонна Саха Өрөспүүбүлүкэтин уһун үйэлээхтэрин “Үйэ Саас” бэлиэни, СӨ Ил Дархана А.С.Николаев уонна РФ Бэрэсидьиэнэ В.В.Путин эҕэрдэ суруктарын ааҕан туттардылар.
Ытык кырдьаҕас ыалдьыттарыгар ааспыт үйэ ыарахан, сэрии саҕанааҕы сут-кураан дьылларын, үөрүүлээх, өрөгөйдөөх кэмнэрин туһунан кэпсии көрүстэ. Ульяна Петровна оччотооҕу кэмҥэ ким ханна үлэлээбитин, тугу гыммытын өйдүүрүттэн киһи сөҕөр-махтайар.
Ульяна Петровна киниэхэ туһаайыллыбыт истиҥ эҕэрдэ тыллары истэн, “Үйэ саас” бэлиэни тутан олорон ис-иһиттэн үөрэн, долгуйан ытамньыйан ылла. Чахчы даҕаны кырдьаҕас киһиэхэ кыра да болҕомто наада. Ульяна Пестрякова курдук 100 сааһыгар олус аҕыйах киһи тиийэр. Сааһырбыт дьон кыһамньылаах көрүүгэ-истиигэ, бүөбэйдээһиҥҥэ наадыйар. Оттон бүгүҥҥү күн туругунан Уус Алдан улууһугар 90 саастарын ааспыт сүүрбэттэн тахса ытык кырдьаҕас олорор. Кинилэргэ доруобай, чэгиэн-чэбдик сылдьан “Үйэ Сааска” тиийэллэригэр баҕарабыт.
Айаал МОЛОКОТИН, ulus.media
