От ыйын 14 күнүгэр Ньурба Хатыытыгар африканец бэйэтинэн тиийэн кэллэ. Хаҥалас улууһун Ой орто оскуолатын кытай уонна английскай тылларын учуутала Марк Оладипо Бабатунде оройуоҥҥа сайыҥҥы лааҕырдарга үлэлээтэ.
Марк Оладипо Бабатунде мичээрдии, күлэ сылдьар сайаҕас майгылаах эдэр киһи быйыл Ньурба куоратыгар уонна Маалыкайга английскай тылы биирдии нэдиэлэ үөрэппит. Күҥҥэ 4 чаастаах. Маалыкайга Мондоку диэн базаҕа, лааҕыр олоҕунан толору олорон, оҕолору кытары уһун күнү быһа алтыһан, олус астыммыт. Оҕолор да англиялыы бэркэ чобуотук кэпсэтэр буолбуттар. Манна даҕатан эттэххэ, 13 оҕолоох “Лингва” английскай тыл лааҕырын (сал. В.В. Петрова) таһынан, “Дьоҕур” математическай лааҕыр (сал. М.И. Спиридонова) аҥаара (12 оҕо) бу “Лингваҕа” дьарыктанна.
Ыалдьыкка “Дьөһөгөй оҕото” музей хаһаайыннара Станислав Иванович, Григорий Григорьевич сиэри-туому толору тутуһан, бэйэлэрин баайдарын-дуолларын көрдөрдүлэр. Учуутал музей экспоната баайын бэлиэтээтэ, сөҕө-махтайа интэриэһиргээн көрдө.
“Үнүгэс” үүнээйи көрөр-харайар лааҕыр (сал. Габышева М.Г.) оҕолоро Маркы кытары биир остуолга олорон, толлубакка нууччалыы ирэ-хоро сэһэргэстилэр.
Марк Нигерияҕа төрөөбүт. Биэс бырааттыылар. 17 сааһыттан төрөппүттэриттэн арахсан, олоҕун бэйэтэ оҥостуммут. Үс кыыстаах саха ыалыгар кыра күтүөттэрэ, үс оҕолоохтор. Икки улахана, Эмили уонна Ара – оскуола үөрэнээччилэрэ, Джулия 5-һин туолуохтаах. Марк биэс омук тылын билэр. Ону таһынан, сахалыы өйдүүр, биирдиилээн саҥарар.
Ыалдьыт олус ыраахпытын, суолбут куһаҕанын сөхпүтүн биллэрдэ. Оҕолор Африкаҕа итии, муҥутаан, 42 кыраадыска тиийэрин истэн, уҥа сыстылар. Английскай тылы билиилэрин да тургутан көрдүлэр. Сааһын ыйыппыттарыгар, омук тылынан хардарбытын, сөпкө өйдөөн, 36-лаах диэтилэр. Дьикти ыалдьыт иннигэр ыллаан, хомустаан, кыра кэнсиэр көрдөрдүлэр. Оҕолор, сөҕө да соһуйа да көрбүт киһилэрин өйдүү-саныы сылдьаары, хаартыскаҕа түстүлэр.
Мирослава ИВАНОВА, Мэҥэдьэк нэһилиэгэ, ulus.media
