Дьокуускай куоракка боксаҕа аан дойду чемпиона, экология кэмитиэтин бэрэссэдээтэлин бастакы солбуйааччы, Госдума дьокутаата Николай Валуев кэлэ сылдьар.
Кини Дьокуускайга икки күн буолуоҕа. Өрөбүл күн Аҕалар лигаларын бэрэссэдээтэлин Айхал Габышевы кытта көрүстэ. Николай Валуев элбэх оҕолоох аҕа буоларын быһыытынан, аҕалар хамсааһыннарыгар улахан болҕомтотун уурар. Ол курдук, оҕо успуордун сайыннарар аһымал пуондатын аатыттан, ыччат ортотугар чөл олоҕу тарҕатыы, успуордунан дьарыктаныы уонна патриотическай иитии туһунан Айхал Габышевы кытта сөбүлэҥ түһэристэ.
“Николай Валуев – биһиги доҕорбут! Аҕалар түмсүүлэрин аатыттан “Дьиэ кэргэн институтун бөҕөргөтүүгэ уонна аҕа оруолун үрдэтиигэ кылаатын иһин” диэн Аҕалар лигаларын мэтээлин туттардым. Бу биһиги түмсүүбүт саамай үрдүк наҕараадата буолар. “Бигэ дьиэ кэргэн” баартыйа бырайыагын эрэгийиэннээҕи координатора буоларым быһыытынан, инникитин бииргэ үлэлиир туһунан кэпсэттибит, былааннастыбыт. Ону таһынан, Саха сирин аҕаларын II съеһин резолюциятын дьүүллэстибит. Николай Валуевы Ыһыахха кэлэн ыалдьыттыырыгар ыҥырдым. Кини улаханнык махтанна”, – диэн Айхал Габышев иһитиннэрдэ.
Оҕолорго уонна улахан дьоҥҥо успуорт араас көрүҥнэригэр спортивнай тэрээһиннэри ыытар туһунан былааннастылар. Николай Валуев бэнидиэнньиккэ успуорт миниистирин кытта көрсүөхтээх. Ону таһынан, “Триумфка” маастар-кылаас ыытыаҕа уонна боксердары кытта көрсүөҕэ.
Виктория СТАСЬ, Yakutia24/Якутия24
