Ил Дархан Айсен Николаев аныгы үйэ сиэринэн социальнай ситимнэри үчүгэйдик туһанар. Ол курдук, сотору-сотору аһаҕас эфиргэ тахсан, өрөспүүбүлүкэ олохтоохторун кытта кэпсэтэр, дьон интэриэһиргиир, мунаахсыйар ыйытыктарыгар хоруй биэрэр, ону таһынан, нэһилиэнньэттэн этиилэри истэр.
Бу, биллэн турар, үлэтигэр-хамнаһыгар уонна норуокка чугас буоларыгар төһүү күүс буолара саарбаҕа суох. Аны “YouTube”-ка “Айсблог” диэн ханаалланна. Бу ханаал ураты буолар чинчилээх. Тоҕо диэтэххэ, Айсен Сергеевич суруналыыс быһыытынан көстүөҕэ. Ол курдук, ураты дьарыктаах, интэриэһинэй дьону кытта кэпсэтиэҕэ, кинилэртэн интервью ылыаҕа. “Айсблог” ханаал бастакы тахсыыта Саха сиригэр стрит-арт хайысха сайдыытын туһунан буолла. Нижний Новгород куораттан сылдьар худуоһунньук Никита Кузнецовы (Nomerz) кытта кэпсэттэ. Ону таһынан, худуоһунньук Кыыдаана Игнатьева, “LETO.YAKUTIA” бэстибээл куратора Евгения Новгородова уо.д.а. кытыннылар.
