Киһини тыатааҕыттан быыһаабыт ХИФУ устудьуона Николай Эверстов уонна Естественнэй наукалар институтун экологическай-географическай салаатын доцена Евгений Захаров, дьоруой-устудьуоннар Алексей Никифоров уонна Трифон Антонов ааттарынан бириэмийэни ыллылар. Наҕарааданы университет ректора Анатолий Николаев туттарда.
Ааспыт сайын экспедиция кэмигэр Николай Максимов диэн устудьуон уолга тыатааҕы саба түспүт. Балааккаттан соһон таһааран ойуур диэки илдьэ сатаабыт. Николайы кытта балааккаҕа доҕоро Николай Эверстов баар эбит. Кини уолуйан хаалбакка доҕорун быыһыы сатаабыт. Ол кэмҥэ уһуйааччылара Евгений Захаров уолаттар хаһыыларын истэн сүүрэн кэлэн тыатааҕыны ыппыт.
“Ахсынньы 9 күнүгэр дойду үрдүнэн Дьоруойдар күннэрэ бэлиэтэнэр. Олохторун толук ууран дьону быыһаабыт устудьуоннарбыт Алексей Никифиров уонна Трифон Антонов ааттарынан бириэмийэни, биһиги университеппыт сыл аайы туттарар. Аспыт сылларга бириэмийэни биир устудьуон ылбыт эбит буоллаҕына, быйыл икки киһи ылла. Кинилэр хорсун санаалаах буоланнар, Николайы адьырҕа кыылтан быыһаатылар”, – диэн Анатолий Николаев кэпсээтэ.
Алексей Никифоров уонна Трифон Николаев аатынан бириэмийэ номнуо бэһис төгүлүн туттарыллар. Николай Эверстов уонна Евгений Захаров 100 тыһ солк суумалаах сэртипикээтинэн наҕараадаланнылар.
