Киир

Киир

Сахаттан бастакы үөрэхтээх быраас Прокопий Сокольников аатын алмаас тааска иҥэриэхтэрэ.

 

 
“2021 сыл өрөспүүбүлүкэбитигэр уонна Чурапчы улууһугар Доруобуйа сылынан биллэриллибитэ. Былырыыҥҥыттан саҕаламмыт хамсыгынан сибээстээн, мэдиссиинэ уонна миэстэтигэр быһаччы үлэлии-хамсыы сылдьар быраас дьон суолталара, оруоллара улаатта. Тоҕо диэтэххэ, дьон олоҕун быраас эрэ быыһыыр, кини дьону-сэргэни ыарыыттан харыстыыр, ытык иэһи толоруу чаҕылхай холобурун көрдөрөр киһи буолар. Биһиги, Чурапчы дьоно-сэргэтэ, “Саха АССР 100 сылыгар 100 анал ааттаах алмаас” бырайыак чэрчитинэн биир дойдулаахпыт Прокопий Нестерович Сокольников аата алмааска иҥэриллэр буолбутуттан олус үөрдүбүт. Прокопий Нестерович Сокольников олоҕо норуот туһугар олох дьиҥнээх уонна чаҕылхай холобура буолар”, – диэн Чурапчы улууһун баһылыга Андрей Ноговицын санаатын үллэһиннэ.
Prokopiy Sokolnikov
 
 
Ил Дархан Айсен Николаев сахаттан бастакы үөрэхтээх быраас, патриот, уопсастыбаннай диэйэтэл П.Н. Сокольников аатын өрөспүүбүлүкэ сириттэн көстүбүт алмааска иҥэрэр туһунан Чурапчы улууһун, П.Н. Сокольников аатынан улуустааҕы киин балыыһа итиэннэ Улуус уопсастыбаннай сүбэтин көҕүлээһинин уонна хадатаайыстыбатын өйөөбүтэ. Прокопий Нестерович Сокольников аата “Саха АССР 100 сылыгар 100 анал ааттаах алмаас” бырайыак чэрчитинэн, ааттара алмааска иҥэриллиэхтээх дьон испииһэгэр киирбитэ.
 
Санаттахха, 2020 сыллаахха, Улуу Кыайыы 75 уонна өрөспүүбүлүкэҕэ Патриотизм сылларыгар, “Саха АССР 100 сылыгар 100 анал ааттаах алмаас” бырайыак саҕаламмыта. Бүгүҥҥү туругунан, ааттара алмааска иҥэриллиэхтээх Саха сирин олохтоохторун испииһэгэ бигэргэнэн турар. Ол испииһэккэ Сэбиэскэй Сойуус Дьоруойдара, Социалистическай үлэ Дьоруойдара, Саха сирин устуоруйатыгар суолларын-иистэрин хаалларбыт биллэр-көстөр дьон, уһулуччулаах судаарыстыбаннай диэйэтэллэр киирбиттэрэ.

 

Ыспыраапка:

П.Н. Сокольников – саха бастакы үөрэхтээх бырааһа, доруобуйа харыстабылын тэрийээччи, чөл олоҕу көҕүлээччи, Сибэтиэй Анна уонна Сибэтиэй Станислав уордьаннар кавалердара, Романовтар династияларын 300 сылыгар анаммыт мэтээл хаһаайына, суруйааччы Л.Н. Толстой доҕоро. Прокопий Нестерович Чурапчыга үлэлии сылдьан тыа сиригэр аан бастакы ыарыһахтары эмтиир анал балыыһаны арыйбыта, оттон 1912 сыллаахха – балыыһа комплексын. Ити кэнниттэн эмтиир-сэрэтэр тэрилтэлэр тиһиктэрин арыйыыга ылсыбыта. Ол курдук, Чөркөөххө (1906 с.) уонна Чычымахха (1913 с.) биэлсэр пууннарын салааларын арыйбыта, үлэһиттэрин биэстии киһиэхэ тиийэ элбэппитэ. Быраастар уонна биэлсэрдэр бастакы холбоһуктаах сийиэстэригэр кыттыбыта. 18 сыл усталаах-туоратыгар земскэй мэдиссиинэ саамай бастыҥ холобурун уонна үтүө үгэстэрин олоххо киллэрбитэ. Харчыга, аакка-суолга наадыйбакка, тиийиммэт-түгэммэт, кыахтаах диэн араарбакка, “барыта бар дьон туһугар” диэн санаанан салайтаран, үрдүк таһымнаахтык үлэлээбитэ, онон үгүс көлүөнэ мэдиссиинэ үлэһитигэр үтүө холобур буолбута.

Тарҕат:

Санааҕын суруй

Бүтэһик сонуннар