Истиҥник саныыр ЛЕНА ВАЛЕРЬЕВНАБЫТ!
Чаҕыл уоттаах Күннээх,
Ойоҕолоон сүүрэр тэбиэн Ыйдаах
Орто туруу бараан дойдуга
Көхсүттэн көнтөстөөх
Арҕаһыттан тэһииннээн
Күн Айыы киһитэ буолаҥҥын
Оройгунан түспүт
Дьоһун бэлиэ күҥҥүнэн
ЭЙЭҔЭС ЭҔЭРДЭНИ тутан кэбис.
ЛЕНА, Или, Эйэни, Тэрээһини түстүүр ХОТОЙ АЙЫЫ ТАҤАРАЛААХ ыйга төрөөҥҥун ҮРДҮК ААР АЙЫЫ ТАҤАРАБЫТ суолугар сирдээччинэн айыллан кэлбит эбиккин. Дириҥ силистээх билиигинэн, киэҥ ыырдаах өйгүнэн-санааҕынан былыргыны, билиҥҥини, кэлэри ситимнээн АЙЫЫ ТАҤАРА ИТЭҔЭЛИН ААН ДОЙДУ ТАҺЫМЫГАР таһаарбыт дьоһун үлэҕинэн киэҥ туттабын, холобур оҥостобун. Ыраас сырдык, кырдьыксыт санаалааххын, мэнээх киһи ылсыбат саха омук эт мэйиилээх атын омуктарын кытта алтыһар ҮЙЭЛЭЭХ далаһаларын дьаһайса, уһун ыллыктарын ыпсаран биэрэ сылдьар сүдү үлэлээх БАСТЫҤ УЧУОНАЙБЫТ буолаҕын. Бу маннык, киһи сөҕөр үлэтин, күүстээх удьуордаах, бигэ тирэхтээх эрэ киһи оҥорор. Лена, Эн үчүгэй төрөппүттэргэ иитиллэҥҥин ДАЛБАР ХОТУН буоллун. Олоҕун аргыһа УЙБААНЫН эркин курдук эрэллээх доҕорун эйиэхэ, биһиэхэ күүс көмө буоларыттан үөрэбин. Ыччаттаргыт куруук үөрдэ сырыттыннар.
ЛЕНА ВАЛЕРЬЕВНА! Ис сүрэхпиттэн чэгиэн-чэбдик туругу, айымньылаах үлэҕэр өссө үрдүк тахсыылары, ситиһиилэри баҕарабын.
Кэрэ киэҥ мичээргинэн
Истиҥ сыһыаҥҥынан
Дьон, ыччат сүрэҕин үөрдэҕин,
Сүргэтин көтөҕөҕүн.
Үрдүк Айыылар күүстэрин ис куккар иҥэр,
Иэйэхситтэрин итии салгыннара
иэйиигин уһугуннардыннар.
Ийэ кутуҥ
Эҥэрдэстин,
Салгын кутуҥ
Салыйбатын,
Буор кутуҥ
Куоппатын.
