Үөһээ Бүлүү Балаҕаннаах нэһилиэгин баһылыга С.И. Дмитриев нэһилиэгин олоҕун-дьаһаҕын, дьонун-сэргэтин куруутун сырдатар, нэһилиэгин өрөспүүбүүлүкэҕэ ааттатар соҕотох баһылык диир сөп буолуо. Бу сырыыга кини нэһилиэгин кырдьаҕас олохтооҕун, 90 сааһыгар диэри ат үрдүттэн арахсыбакка сылдьар Саха саарынын, киһи кэрэмэһин Иннокентий Кардашевскайы-Киэсэ Хардаһыабыскайы Саха НКИК улуустааҕы филиала устубуттарын туһунан кэпсээтэ.
Иннокентий Васильевич бэйэтин кэмигэр Үөһээ Бүлүү оруйуонун биир күүстээх хапсаҕайдьыта, тустууга, оройуон ыһыахтарын, күрэхтэһиилэрин элбэх төгүллээх кыайыылааҕа эбит. Кини эдэриттэн сааһырыар диэри аты айааһааһыны, ат сүүрдүүтүн көҕүлээччитинэн биллэр. Исидор Бараахап аатынан сопхуос баарыгар Бэс түбэтэ диэн сиргэ оттуур звеноны салайан үлэлэтэн, атынан оҕустаран, мустаран, хас эмэ сүүһүнэн туонна оту сылын аайы оттоон, сопхуос Намнааҕы отделениетыгар улахан көмөнү оҥорбут үлэһит бэрдэ этэ.
Кини - "Ытык кырдьаҕас" бэлиэ хаһаайына, тыа хаһаайыстыбатын бэтэрээнэ, каадырабай булчут, Балаҕаннаах, Нам нэһилиэктэрин бочуоттаах олохтооҕо. 90 сааһын сайын, Олоҥхо ыһыаҕын кэмигэр, томточчу туолар эбит. Иннокентий кэргэнинээн Матрена Емельяновналыын 6 оҕону атахтарыгар туруорбуттара, билигин элбэх сиэн, хос сиэн эйэҕэс эһээтэ. Күн бүгүн кини Үөһээ Бүлүү улууһун Нам нэһилиэгэр, оҕолорун таһыгар дьиэ туттан, соҕотоҕун олорор.
90 саастаах Иннокентий Васильевич Кардашевскай сааһырдым диэн дьиэҕэ баттанан олорбот, күн тахсыыта туран, сылгыларын көрөр, оттон сайынын оттуур, кэбиһиилээх от үрдүттэн түспэт, солбуллубат отчут бэрдэ эбит.
Иннокентий Васильевич: «Бары массыынанан сылдьаллар, ат диэни мииммэт буоллулар. Оттон биһиги былыргы дьон буоллахпыт, сылгынан, ынах сүөһүнэн сылдьар дьоммут...» - диэн этэр.
Кини миинэ сылдьар ата отучча саастаах, Верхоян диэн ааттаах.
- Уол оҕо аттаах буолуохтаах, сылгы эрэ баар буолан биһиги баарбыт, уонна мантыкайын эмтээх... Сылгы киһини кытта киһи курдук кэпсэтэр, туох буоларын барытын билэр, айылҕа оҕолоро... - дии-дии, аарыма кырдьаҕас өр сыл устата доҕор буолбут миинэр миҥэтин имэрийэ-имэрийэ, кэпсиир. Кини атын олус минньигэстик доҕорум, сэгэрим сыыһа диэн таптаан ааттыыр эбит.
«Күн бүгүн оҕонньор уолунаан Спартактыын 29 сылгыны, ол иһигэр 20 биэни көрөллөр. Кини эдэриттэн сааһырыар диэри ат айааһааһынын, сүүрдүүтүн көҕүлээччинэн биллэр. Бэс түбэтигэр оттуур звенону салайан үлэлэтэн, атынан оҕустаран, мустаран, хас эмэ сүүһүнэн туонна оту сылын аайы оттуура» диэн Үөһээ Бүлүү улууһун саайтыгар ытык кырдьаҕас туһунан сырдаппыттар.
Иннокентий Кардашевскай уһуллубут биидьийэтигэр, үлэни кыайыахха наада, салгыҥҥа сылдьар үчүгэй, айылҕаҕа сылдьар дьол буоллаҕа диир уонна: «Дьоллоох киһибин!» - диэт, Верхоян диэн ааттаах атын мииммитинэн, киэҥ уулусса устун айанната турар...
Чахчыта даҕаны, бу уһуллубут биэриигэ көрдөххө, ытык кырдьаҕас чэпчэкитик ат уорҕатыгар тахсар, сирэйэ-хараҕа бэрт сэргэх.
Онон, оҕонньор сэнэх туругуттан көрдөххө, өбүгэ үгэһин тутуһан, сылгыны иитэн, тимир көлө оннугар атынан сылдьар киһи бигэр туруктаах, чөл доруобуйалаах буолар эбит... Маныаха, ытык кырдьаҕас: «Уһун үйэ, чэгиэн сылдьыы сүнньэ үлэҕэ, хамсана сылдьарга сытар» - диэн этэрэ кырдьык оруннаах.
