Кэнники икки сылы быһа аан дойдуну сордообут хоруона хамсыгын “көмөтүнэн”, Арассыыйаҕа чөл олоҕу тутуһар дьон ахсаана 6 мөлүйүөн киһинэн көҕүрээн биэрдэ.
Холобур, 2021 сыл түмүгүнэн урут тутуһа сылдьыбыт чөл олоҕуттан тэйэн арыгыга, табахха уо.д.а. куһаҕан дьаллыкка убаммыт дьон ахсаана 2,24 мөл. тиийбит. Ону таһынан, 2,7 мөл. киһи төрүкү да чөл олох диэҥҥэ наадыйбат этэ уо.д.а.
“Чөл олоҕу эҥкилэ суох тутуһар” диэн бөлөххө табахтаабат, күҥҥэ 400 г итэҕэһэ суох оҕуруот аһын уонна фруктаны сиир, биир нэдиэлэҕэ 3 чаастан ордук эрчиллэр-дьарыктанар, нэдиэлэ устата 168 г тиийбэт испиири иһэр дьон киирэллэр. 2021 с. туругунан, РФга оннук дьон дойду нэһилиэнньэтин 7,1 %-нын ылаллара.
РФ 55 эрэгийиэнигэр доруобуйатын туругун көрүнэр дьон улахан аҥаара бу дьарыгын тохтоппут, Чукоткаҕа уонна Калмыкияҕа оннук дьон букатын да ордубатахтар. Үгэс курдук, дьон байдаҕына, кыаҕырдаҕына доруобуйатын көрүнэн, ол иһигэр чөл олох нуорматын тутуһан барар. Дьадаҥы киһи оннукка наадыйбат. Сааҥсыйалар ыга дьайан истэхтэрин аайы, дойдубутугар чөл олохтоох киһи букатын да сүтүөн сөп.
