Саха улууһугар Олоҥхо ыһыаҕын, араас култуурунай тэрээһиннэри олус тэрээһиннээхтик ыытар, култуура управлениетын салайааччытынан 33-с сылын үлэлии сылдьар, нуучча кыыһа Тамара Николаевна Кесареваны истиҥник эҕэрдэлээн туран...
Култуура үлэһиттэрин күнүнэн бу эйгэҕэ үлэлээччилэри барыларын эҕэрдэлээн, махтанан туран, биһиги, Горнайдар, аҥардас култуура салалтатын начаалынньыгынан 33-с сылын үлэлии сылдьар Тамара Николаевна Кесареваны киэн тутта ааттыыбыт. Мин кинини оҕо эрдэҕиттэн билэбин. Ийэлээх аҕата соҕурууттан кэлэн, Саха сирин туругурдууга үлэлэспит нуучча чулуу дьоно. Аҕата Николай Никитич Бекасов – биллиилээх ветбыраас, уордьаннаах буойун, ийэтэ Анна Васильевна хас эмэ сүүһүнэн саха оҕотугар күн сирин көрдөрбүт акушер, кэлин уһун кэмҥэ дьааһыла сэбиэдиссэйэ, уопсастыбаннык бэрдэ.
Тамара Николаевна олох оҕо эрдэҕиттэн чаҕылхай спортсмен. Бэйэтин үөлээннэхтэригэр кими да киһилээбэт сүүрүк, уһуну ойууга эмиэ бастыҥ. Олус энергичнай, хаама-сиимэ да сылдьара олох ураты этэ. Култуура эйгэтигэр маннык уһуннук үлэлээһинэ, бэйэтин идэтигэр олус бэриниилээҕин, айар талааннааҕын, улахан тэрээһиннээҕин, кылаабынайа, кими баҕарар кытта олус тапсарын, быһата, норуот кыыһа буоларын көрдөрөр. Саха Өрөспүүбүлүкэтин норуодунай суруйааччыта Савва Тарасов биирдэ маннык диэн турар: «Бу нуучча кыыһа Тамара Николаевна саха улууһугар ыытар култуураҕа сыһыаннаах мероприятиялара, ханнык баҕарар таһымнаах суруйааччылары кытта көрсүһүүлэрэ, кими баҕарар үөрдэр, сөхтөрөр, сороҕор соһутар да, дириҥ ис хоһоонноохтор». Кырдьыга да оннук. Өрөспүүбүлүкэ таһымыгар эттэххэ, Горнайга ыытыллыбыт Олоҥхо ыһыаҕа, Манчаары оонньуулара олус үрдүк таһымнаахтык, тэрээһиннээхтик барбыттарын туһунан элбэх ыалдьыт, Саха сирин хаһыаттара, араадьыйата, телевидениета суруйан, кэпсээн, көрдөрөн турар.
Биирдэ Тамара Николаевна улууска буолбут үбүлүөйүгэр, эҕэрдэлиирим быыһыгар манныгы бэлиэтээбитим. Миниистир А.С.Борисов саҕана. Горнайдар бу комсомолга, партияҕа, оройуон Сэбиэтигэр ситиһиилээхтик үлэлээбит кадрбытын кыайан үүннэрбэтибит, Бырабыыталыстыба, култуура министиэристибэтэ бэйэтигэр ылан, эрийэн-мускуйан, өссө сайыннаран, үрдүкү таһымҥа үлэлэппэтилэр, кыаҕын ситэ туһамматылар. Хайа да сахаттан итэҕэһэ суох уу сахалыы саҥарар, ыллыыр, ханнык баҕарар аудиторияҕа истээччини бэйэтигэр тардар, киэҥ билиилээх салайааччыны, нуучча кыыһын, били этэргэ дылы, «Сүүрүк аты биирдэ да, күрэхтэһиннэрбэккэ, хаһааҕа хаайан турар курдук буоллубут», - диэбиттээх этим. Туох да уларыйбатаа, онтон сүүрбэччэ сыл ааста. Саас бардаа, барда... Онон эдэрдэри тыа сириттэн кэмигэр үүннэрэ-сайыннара, хам баттыы сыппакка, кыахтарын толору туһанар үгэс, салҕана турарыгар баҕарабын.
Таарыйа аҕыннахха, Тамара Николевна күндү төрөппүттэрин туһунан, Ытык иэһин толорон «В бою и в труде ими кована Победа» диэн олус дириҥ ис хоһоонноох кинигэни бэчээттэппитэ улахан сэҥээриини ылбыта. Наһаа элбэх киһи махтаммыта, үтүө да дьон кэлэн, үлэлээн-хамнаан ааспыттарын бу кинигэттэн ааҕыаххытын сөп.
Василий Алексеев.
Туһаныллыбыт сигэтэ: https://xn----7sbbprs1bdnl.xn--p1ai/article/47804
