Муус устар 27 күнүгэр Сахабыт сирин дьоно-сэргэтэ сыл аайы Өрөспүүбүлүкэ күнүн бэлиэтиир. Быйыл бу ураты күн Саха сирин бары олохтоохторугар кэрэ-бэлиэ, кэтэһиилээх күндү күн буолан үүнэн кэллэ – Саха сирэ автономияны ылбыта, судаарыстыбаннаспыт олохтоммута 100 сыла туолла!
Өрөспүүбүлүкэ дьоно-сэргэтэ Максим Аммосов, Былатыан Ойуунускай, Исидор Барахов, Степан Аржаков уонна кинилэри кытта Саха сирэ автономнай өрөспүүбүлүкэ быраабын ылары ситиспит, үгүс сыраларын уурбут дьоммутун кэриэстииллэр уонна истиҥник махтаналлар.
Биһиги Ийэ дойдубут Арассыыйа атын дойдуларга суох уратытынан баараҕай, сүҥкэн киэҥ сирдээх дойдуну манна олорор норуоттар устуоруйаларын ытыктаан, култуураларын, тылларын байытан сайыннарар үтүө үгэһи тутуһара буолар.
Мин Канадаҕа Арассыыйа эргиэнин бэрэстэбиитэлин быһыытынан Хотугу Эмиэрикэ төрүт норуоттарын кытта резервацияларга алтыһааччыбын. Бу көрсүһүүлэргэ, кэпсэтиилэргэ санаабатаҕыҥ, баҕарбатаҕыҥ да үрдүнэн, кинилэр олохторун таһымын, үтүрүллүбүт, кыргыллыбыт, көһөрүллүбүт устуоруйаларын, билиҥҥи сайдыыларын кытта биһиги өрөспүүбүлүкэбит олоҕун тэҥнээн көрөҕүн. Дьэ, итиннэ Сахабыт сиригэр төрүт олохтоох норуоттар тыһыынчанан сылларга өбүгэлэрин сирдэригэр олорон үрдүк сайдыыны ситиһэллэригэр Арассыыйа судаарыстыбатын сомоҕолуур нуучча норуотун улахан үтүөтэ көстөр.
1922 с. Саха сирэ автономияны ситиһиитэ инники сайдыыбыт олугун уурбута. Ол курдук, үйэ анараа өттүттэн өрөспүүбүлүкэҕэ бырамыысыланнас, доруобуйа харыстабыла, үөрэх, билим, тыа хаһаайыстыбата, култуура күүскэ сайдан барбыттара. Бүгүн саха норуота аан дойду сайдыылаах омуктарын кытта, тугунан да хаалсыбакка тэҥҥэ хаамсар.
Ытыктабыллаах биир дойдулаахтарым!
Арассыыйа элбэх омуктаах норуота үйэлэр тухары сомоҕолоһон, санаатын күүһүнэн, инникигэ дьулуурунан, ураты тулуурунан кыайыылаах-хотуулаах тахсарын биһиги устуоруйабыт туоһулуур.
Мин Саха Өрөспүүбүлүкэтэ бу ааспыт 100 сылга ситиспит үрдүк ситиһиилэрэ социальнай-экэнэмиичэскэй сайдыытын бигэ тирэҕэ буолуохтара диэн эрэнэбин уонна итэҕэйэбин.
Канадаҕа Арассыыйа эргиэнин бэрэстэбиитэлистибэтин уонна тус бэйэм ааппыттан Сахам сирин бар дьонун-сэргэтин төрөөбүт өрөспүүбүлүкэбит тэриллибитэ 100 сылын туолбутунан итиитик-истиҥник эҕэрдэлиибин!
Эһиэхэ барыгытыгар уонна чугас дьоҥҥутугар чэгиэн доруобуйаны, күүстээх санааны, тулууру уонна инникигэ эрэли баҕарабын. Бэйэҕитин харыстана сылдьыҥ! Дьоллоох буолуҥ!
Валерий Максимов,Канадаҕа Арассыыйа эргиэнин бэрэстэбиитэлэ.
