Зоя Афанасьевна КОРНИЛОВА, Ил Түмэн, РСФСР Верховнай Сэбиэтин (1990-1993 сс.), үс болдьоххо Ил Түмэн дьокутаата:
– Күндү биир дойдулаахтарым, 2022 сыл муус устар 27 күнэ – судургу бырааһынньык буолбатах. Лоп курдук биир үйэ анараа өттүгэр саха норуотун устуоруйатыгар сүдү суолталаах сабыытыйа буолбута. Судаарыстыбаннастаах буолан, сахалар сирбитин, култуурабытын, тылбытын тутан олоробут. Үөрэхтээһини, бырамыысаланнаһы сөҕүмэрдик сайыннардыбыт. Бу – дойдубут сүүс сыллаах устуоруйатын дириҥник ырытан көрөр, өрөспүүбүлүкэбит чэчирии сайдарын, норуоппут олоҕо тупсарын туһугар тугу үлэлээн кэлбиппитин эргиллэн көрөр үтүө күммүт. Ити кэм барыта уурбут-туппут курдук көнө буолбатах этэ. Ол быыһыгар уустук кэмнэр эмиэ бааллара. Бүгүн – ыарахаттары хайдах туораабыппытын, алҕастарбытын-итэҕэстэрбитин уонна олору хайдах көннөрбүппүтүн эмиэ саныыбыт.
Саха Өрөспүүбүлүкэтин судаарыстыбаннаһын 100 сыллаах үбүлүөйүн өрө көтөҕүллэн көрсөбүт. Саха норуотун чулуу уолаттарын Былатыан Ойуунускай, Максим Аммосов, Исидор Барахов, Степан Аржаков уо.д.а. суолларын хайабыт. Өксөкүлээх Өлөксөй Арассыыйаны кытары бииргэ эйэлээхтик олорорбутугар сүбэлээбитин ылынан, РФ өйөбүлүнэн билиҥҥэ диэри Саха Өрөспүүбүлүкэтэ буолан сириэдийэн олоробут. Бу биһиги инники сайдыыбытыгар кыаҕы биэрэр.
Сайдар кэскилбит биһиги хас биирдиибититтэн тутулуктааҕын өйдүөхтээхпит.
