Ыам ыйын 10 күнүгэр саха сылгытын аар-саарга аатырдар сырдык ыралаах Дугуйдаан Винокуров Омскай уобалас кыраныыссатын туораата. Ол эбэтэр, саха сылгылара сэттис эрэгийиэннэригэр үктэннилэр. Туруктара этэҥҥэ.
Дугуйдаан кэнники икки күҥҥэ сылгыларын инники илдьэ-илдьэ, суолтан массыына тутан, “Соболь” тимир көлөтүн бэйэтэ сылгылаан ыыта сылдьыбыт. Хаҥалас суоппар уолаттара Красноярскайтан төннүбүттэр эбит. Атын суоппары Красноярскайтан кэпсэппиттэрэ айаны ыарырҕатан, тохтообут. Хата, урбаанньыт Владимир Федоров Омскай уобалаһынан айанныырга саҥа суоппары кэпсэппит.
Билигин аттаах айанньыты кытта СӨ ТХМ, урбаанньыт, мэссэнээт В. Федоров, Географическай уопсастыба Саха сиринээҕи салаата ыкса сибээстэһэллэр эбит. Дугуйдаан Москубаҕа от ыйын бүтүүтэ эбэтэр атырдьах ыйыгар тиийэргэ суоттанар.
Хоту сир хоһуун сылгыһытыгар алгыстаах айаны баҕарыаҕыҥ. Этэҥҥэ буол, эр хоһуун!
