СӨ Ил Дархана Айсен Николаев «Ийэ тыл – омук үрдүк айылгытын төрдө» диэн хайысхаҕа көрбүт граныгар тирэнэн ыытыллар «Айыы арчыта» күрэххэ айымньылар киирэ тураллар. Санаттахха, күрэххэ кыттар хоһоон эбэтэр кэпсээн ийэҕэ анаммыт буолуохтаах. Үлэлэри тутуу бу сыл атырдьах ыйын 31 күнүгэр диэри. Сиһилии «Кыым» хаһыакка (27.01.2022) уонна kurulgen телеграм ханаалга булан көрүөххэ сөп.
Кэрэхсэбиллээҕэ, күрэҕи урбаанньыттар эмиэ өйөөтүлэр. Ол курдук, «Уран Саха» фирма салайааччыта Лука Митрофанович Егоров кылаан кыайыылаах хоһоонньукка уонна кэпсээнньиккэ туттарыллар үрүҥ көмүс бэлиэлэри босхо оҥорон тэрийэр бөлөххө туттарда. Бэлиэ суруйааччы Алексей Татаринов-Удьурҕай торумунан оҥоһулунна. Онуоха бэлиэҕэ баар чыычаах, саха төрүт өйдөбүлүнэн, тыл иччитэ Ытык Чыыбыстааны сирэйдээн көрдөрөр.
Эргиэн-урбаан дьоно тылбыт-сурукпут туруга барыбыт кыһалҕата буоларын өйдүүллэрэ олус хайҕаллаах.