Айымньылаах, сайыннарар (креативнай) индустрияны сэргиир, сэҥээрэр сүүстэн тахса оҕо мустан, бу күннэргэ «Skills Camp» диэн үөрэтэр-бырайыактыыр симиэнэҕэ дьарыктана сылдьаллар. Бу бырайыагы Үүнэр көлүөнэ тус сыаллаах пуонда “Кэлэр кэскил туһугар” диэн бырагырааматын нөҥүө, АЛРОСА үбүн суотугар, тэрийэн үлэлэтэр.
Бу сайыҥҥы оскуола Хаҥалас улууһун Чапаево бөһүөлэгэр түстэммит Билим аччыгый академиятын үөрэнэр куорпуһугар үлэлиир. “Үүнэр көлүөнэ паарката” бырайыак чэрчитинэн, тус сыаллаах Үүнэр көлүөнэ пуондата уонна Билим аччыгый академиятын кытта кыттыһан тэрийбиттэрэ. Сонун лааҕыр оҕолорун Москубатааҕы эрдэҕэс саастаах оҕолорго ананар «Deti MBA» диэн биисинэс-оскуолаттан кэлбит сүрүннүүр эспиэрдэр дьарыктыыллар, билиигэ сирдииллэр.
«Күн бүгүн биһиги тутаах уонна бэлиэ суолталаах бырайыактарбытыттан биирдэстэрэ – Үүнэр көлүөнэ паарката буолар. Билигин паарка Дьокуускайга түстэниэхтээх былаһааккатын оҥоро, бэлэмнии сылдьаллар. Ыытыллар үлэни 2025 сылга түмүктээн, тустаах туонаны ити сыл арыйар былааннаахпыт. Бу үлэни биһиги пуондабыт АЛРОСА үбүгэр ыытар. Тустаах паарка атыттартан уратытын, иһигэр былааннанар тутуулар ис-тас өттүлэрэ, суолталара араастаһарын урут да кэпсээн турабыт. Күөх үүнээйилэри, оҕо уонна успуорт былаһааккаларын сэргэ ыччакка анаммыт Үөрэтэр киин олохтонуо. Онно креативнай индустрия хайысхатынан араас эгэлгэ элбэх, ол иһигэр үөрэтэр-сайыннарар ис хоһоонноох тэрээһиннэр буолуохтара. Билигин биһигини кытта бэлиэр бииргэ үлэлэһэ сылдьар партнердардаахпыт: СӨ Национальнай бибилэтиэкэтэ, Эбии үөрэхтээһин киинэ, араас кэмиэрчэскэй уонна кэмиэрчэскэйэ да суох тэрилтэлэр.
Ол быһыытынан, биһиги тутуу оҥоһуллан бүтэр, силигэ ситэр 2025 сылын кэтэһэн олорбокко, эрдэттэн креативнай туонаҕа дьарыктыыр уонна үлэлиир дьон түмсүүлэрин таҥар, түмэр үлэни бэлиэр саҕалаабыппыт. Кинилэр истэригэр педагогтар, маастардар, араас идэлээхтэр уонна, биллэн турар, оҕолор бэйэлэрэ эмиэ бааллар. Кинилэр билиҥҥитэ тустаах хайысхаҕа бастакы сэмэй хардыылары оҥорор эбит буоллахтарына, төһө да саастара кыратын иһин, бэлиэр үс сылынан бэйэлэрэ ситиһиилээх исписэлиис буола үүнэн тахсыахтара. Ол иһин биһиги бу түмсүү бүтүннүү тутуспутунан саҥа олохтоммут былаһааккаҕа көһүөҕүн баҕарабыт. Ону таһыган кэккэ хайысхаҕа араас тэрээһини бэлэмниибит. Холобур, медиа, урбаан, кулинария тэрээһиннэрэ, араас хабааннаах күрэхтэр буолуталаабыттара. Дьэ, ол хайысхалары барытын киэҥник хабар «Skills Camp» лааҕыры Өктөмнөөҕү Билим аччыгый академиятын территориятыгар тэрийдибит. Кэнэҕэһин да биһиги пилотнай үөрэтии бырагыраамаларын маннык сайыҥҥы лааҕырдарга түмэр буолуохпут. Олорго эмиэ Саха сирин эрэ буолбакка, Арассыыйа уонна аан дойду таһымнаах эспиэрдэр кыттыахтара», – диэн, “СӨ Тус сыаллаах Үүнэр көлүөнэ пуондата” НО генеральнай дириэктэрэ Владимир Егоров кылгастык билиһиннэрдэ.
Бу сайыҥҥы оскуола иһинэн оҕолор уон күн устата айымньылаах уонна сонуну-саҥаны торумнуур ураты эйгэҕэ сылдьаллар. Дьарыктарын бырагыраамата балай эмэ киэҥ. Сыала-соруга креативнай индустриянан ылсан дьарыктанар баҕаны көҕүлүүр, итиннэ сыһыаннаах идэлэргэ оҕолору интэриэстиир аналлаах. Интерактивнай бырагыраама оҕолор толкуйдуур дьоҕурдара сайдарыгар, билиилэрэ-көрүүлэрэ кэҥииригэр уонна успуорт, эт-хаан өттүнэн сайдалларыгар бигэ тирэх, олук буолар. Кэрэхсэбиллээҕэ, лааҕыр сорох кыттыылаахтара бу дьарыктарга хайыы үйэ элбэҕи баһылыы, үөрүйэхтэнэ охсон, айымньылаах үлэлэрин тупсарыыга ылбыт сатабылларын туһана сылдьаллар.
«Skills Camp» – аныгы кэм киэҥ ис хоһоонноох уонна ураты туһалаах лааҕыра!
