“Киин куорат” хаһыат суруналыыһа, бүгүн, атырдьах ыйын 18 күнүгэр, сүрэхпитигэр оспот бааһы хаалларан барбыта 1 сылын туолла. Эйигинэ суох олус ыарахан сылы аһардым. Бииргэ үүт-үкчү таҥнан-симэнэн, сиэттиһэн баран хаамарбытын, сылдьарбытын олус даҕаны суохтаатым. Хааман иһэн, бүдүрүйэн ылабын, хараҕым уута субулларын киэр хаһыйабын. Игирэлэр быстыбат силимнээхтэр дииллэр эрээри, эн миигин быраҕан барыаххыттан биирдэ даҕаны түүлбэр киирэн ааспатыҥ, салгыны хамсаппатыҥ. Миигин аймыаххын, уйадытыаххын баҕарбаккын сэрэйэбин. Орто дойду олоҕор баар кэмҥэр элбэх ыччаттаах эдьиийгин хараҕыҥ харатын курдук наһаа харыстыырыҥ. Умнубаппын сэгэрбин, санаабатах күнүм суох. Киэһэ эйигин санаабытынан утуйабын, сарсыарда ааккын ааттаабытынан уһуктабын. Игирэ ситимэ үйэлэргэ быстыбат...
Ураты этэ
“Орто дойду...” Мин Сардааналыын бу Орто дойдуга «Орто дойду» хаһыакка билсибитим. Биир күн эрэдээксийэҕэ олус килбиктик туттубут, узбектыы хараҥа халлаан күөҕэ баархат халааттаах 3-4 саастаах уолчаан батыһыннарыылаах киирэн кэлбитэ. Мичээр быыһынан сибигинэйэн кэриэтэ, «матырыйаал аҕаллым» дии-дии, тэбис-тэҥ буукубаларынан, илиинэн суруллубут лиистэри утары ууммута. Оччолорго суруналыыстар үксэ саҥа көмпүүтэри баһылаан испиппит, ааптардар ыстатыйаларын дискиэтэ (флоппи) диэҥҥэ уган аҕалаллара. Соһуйуом иһин, суорумньу туһунан ыстатыйа этэ. Оччолорго олус хорсун, сонун тиэмэ. Сотору соҕус Сардаана Ивановна игирэлээҕин билэн, өссө соһуйбутум. Орто дойду олоҕор мин Сардаананы кытта билсиһиим итинник ураты этэ.
Бу санаатахха, биһиги Сардаанабыт, чахчы да, ураты киһи кэлэн бараахтаабыт. Күннээҕи түбүктэн саҕалаан, олоҕу көрүүгэ тиийэ. Үлэтин олус сөбүлүүрэ. Көҥүллүк тыынар, санаабытын сайа этэр үлэлээхпит диэн ааттыыра. Хаһыат биир уустук «Сытыы муннук» рубрикатын үксүгэр киниэхэ эрэнэрбит. Эрэдээксийэҕэ өрөбүллэргэ кытта олорооччу, киэһэ хойут эрэдээксийэни хатаан барааччы кини буолара. Үлэнэн тойоттору кытта куорат хаһаайыстыбаларынан эриэйдэҕэ барыы буоллаҕына, эрэл эрэ Сардаанаҕа буолааччы. Салалта өттүттэн былааннаах эриэйдэ суох буоллаҕына, бэйэтин санаатынан тохсунньу тоһуттар тымныыта, от ыйын өҥүрүк куйааһа диэн толлон турбакка, өрөбүлүн аахсыбакка, 17-с кыбартаал сыбаалкаларынан, Труд уулуссатын атыыһыттарынан, Кытай ырыынагынан, арыгы маҕаһыыннарынан кэрийэр, кэмиттэн кэмигэр суруйар, кириитикэлиир, былаас дьаһал ылынарын туруорсар үгэстээҕэ. Оннук суруналыыс, бука, суох буолуохтаах.
2-лии сыл буола-буола игирэтин аҥаарыныын уоппускаларын булгуччу Узбекистаҥҥа атаараллара. Эдэр саастара ааспыт Узбекистаннарын төрөөбүт дойду тэҥэ күндүтүк саныыр, санаалара сытар, дууһалара ылынар буолан, 2-лии ыйга тиийэ сылдьан, күүлэйдээн кэлэллэрэ. Арай Сардаанабыт былырыын уоппускатыгар соҕотоҕун бэйэтигэр Турцияны “арыйбыта”. Хаста даҕаны биһиэхэ видеозвоногунан муораны, куораты, ол дойду ырыынагын көрдөрбүтэ. Олус сөбүлээбит этэ. Кэлбитигэр: «Сардаана, эн Турцияҕа олоруоххун сөп эбит, интэриниэтинэн үлэлиэҥ буоллаҕа», – диэбиппин, олус сэргии истибитэ, онно элбэх саха баарын, кини эмиэ баҕатыйарын билиммитэ. Узбектыы тото кэпсэтэринэн охсон, түүрдүү тылы үөрэтэр былааннааҕын эппитэ.
Сардаанабыт ити курдук үгүспүтүттэн ураты этэ. Таҥнардыын-симэнэрдиин, кэпсэтэрдиин, толкуйдуурдуун. Уонна, бу санаатахха, биир уратыта, олус көҥүл эбит. Бу кэлин хамсыктан сылтаан кэлиигэ-барыыга хааччах сытыырхайбытыттан, быһыыны (вакцина) бүгүстээһин саҕаламмытыттан олус эрэйдэммитэ, дууһата моруу буолбута. Ол сирэйигэр көстөрө. Муус доруобай киһини ити хааччахтар кэбирэппиттэрэ мөккүөрэ суох. Мин тус санаам итинник.
Галина СПИРИДОНОВА.
Тулуйуҥ дуу...
Мин Сардааналыын билсибитим, арааһа, 20-чэ сыл буоллаҕа буолуо. Ол сахха эрэдээксийэбит билиҥҥи “Туймаада” атыы-эргиэн киинэ турар миэстэтигэр баара, ол типография этэ. Онно саҥа киирэн үлэлии сырыттахпына, икки кырачаан, үүт-үкчү узбек былаачыйатын кэппит, баттахтарын наһаа элбэх гына өрүммүт кыргыттары сиэтэн, Сардаана кэлэн матырыйаал аҕалара. Оччолорго эрэдээктэрбит А.В. Аргунов этэ. Кумааҕы да күндү быһыылааҕа, билиҥҥи А-4 курдук гынан баран саһархайдыҥы өҥнөөх, чараас кумааҕыны суруйарга диэн ылан барара. Мин ол саҕана кэриэктэр уонна нобуордааччы этим. Сардаана суруйбут ыстатыйаларын элбэхтэ бэчээттээтэҕим буолуо.
Дьылҕа Хаан ыйааҕа кытаанах. Ону кытта мөккүспүт суох, ол гынан баран киһи сөпсөспөт, итэҕэйбэт түгэнэ элбэх. Сорох ардыгар кыһыыгыттан хаһыытыаххын, тоҕо, туох иһин диэн ытыаххын, айманыаххын баҕараҕын. Тоҕо, туох иһин саамай олохторун үгэнигэр, үлэлии-хамсыы сылдьар, олоҕу олуһун таптыыр күндү дьоммутун ылан барарый? Тоҕо чугас дьонун ытатан-соҥотон соҕотох хааллартыырый?
Биһиги Сардаанабыт олус үлэһит, талааннаах, наһаа элбэх дьүөгэлэрдээх, билэр дьонноох этэ. Сорох ардыгар билбэт киһитэ суох да диэххин баҕараҕын. Киэҥ сирдэринэн, өрөспүүбүлүкэ араас муннуктарынан сылдьан, сытыы тиэмэлэргэ үгүс элбэх ыстатыйалары аҕалтыыра, айанныырын наһаа сөбүлүүрэ. Сардаана ыстатыйаларын уһуннук суруйара, сорох ардыгар тиэтэтэрбит, кини ону сөбүлээбэтэ. Сэрэдэ – хаһыат тахсар күнэ, онуоха кини сороҕор саҕалыы да илик буолара, онно эбиитин балаһалары корректуралыыр. Ол да буоллар, хойутаан даҕаны син биир матырыйаалын сыа-сым курдук суруйан, туттаран тиһэҕэр тиэрдэрэ. Араас тиэмэҕэ барытыгар хорсуннук суруйара, дьаныардаах буолан тиһэҕин булан тэйэрэ. Киһини тылыгар киллэрэр үтүө өрүттээҕэ, онтон элбэх интервью, матырыйаал таҕыстаҕа. Араас таһымнаах дьону кытта кэпсэтэрэ, бэрт интэриэһинэй, ааҕыллымтыа гына суруйара.
Кини кэрэни, саҥаны олус кэрэхсиирэ. Наһаа маанытык таҥнара-симэнэрэ. Соҕуруу, омук сирдэригэр бардаҕына хайаан да барыбытыгар кэһиилээх, илии тутуурдаах кэлэрэ. Сылдьыбыт дойдуларын субу баардыы ааҕааччыларыгар суруйан тиэрдэрэ. Ол 20-чэ сыллаахтан “Суорумньу” диэн ааптарыскай рубрикалааҕа. Онтон элбэх киһи ыал буолан олордоҕо, сороҕор ол дьонун тылыгар киллэрэн олохторун хаһыакка суруйара.
Аны туран дэлэй илиилээҕэ, кини эбиэккэ аҕалар аһа хайаан да барыбытыттан улахан иһиттээҕэ, олус минньигэһэ, ол курдук ийэтин көбүөрдээх лэппиэскэтэ, духуопкаҕа буспут бэрэскитэ бу элбэҕэ. Сардаана оҕолуу уйан дууһалааҕа. Кыраттан хомойуон, арыт олус үрдүктүк үөрэн туруон сөбө. Сороҕор тугу тута сылдьарын киһи сатаан таайбат этэ, оннук бүтэйдии иһигэр илдьэ сылдьара. Онтун төлө биэрэн, олус аһыллан, оҕолуу үөрэн, наһаа астынан сэһэргиирэ.
Чугастык билэр киһигин ааспыт кэмҥэ тутан суруйуу олус ыарахан, тус бэйэм бу кутурҕан сонуну итэҕэйиэхпин баҕарбаппын. Хаһан эрэ эрэдээксийэбит аанын арыйан, сэрэммит курдук үктэнэн, толору миинэ тохтубутуттан саҥа аллайан: “Хаһан эбиэттиибит, аччыктаатыгыт дуо?” – диэбитинэн киирэн кэлэргин олус суохтуубут.
Наталья КЫЧКИНА.
Быдан дьылларга быраһаай, Сардаа!
Сардааны мин билиҥҥэ диэри ханна эрэ ыраах айаҥҥа барбытын курдук саныыбын, оннук сүтүк аһыыта-абата арыый атыннык ылыныллар курдук эбит. Куруук ханна эрэ бараары-кэлээри, үөрбүт-көппүт настарыанньалаах, сырдык, ыраас эдэр мөссүөнүн өйдөөн хаалыахпын баҕарабын. Мэлдьи көмөлөһөр, сүбэлиир-амалыыр идэлээҕэ. Элбэх айаннарыттан өрүү кэһиилээх кэлэрэ.
Күн аайы үлэтигэр үөрэ-көтө кэлэр киһи кини этэ. Ол иһин эрэдээксийэҕэ хаһан баҕарар тиийдэххэ, Сардаана билигин да баар буолуох курдук... Олус оҕомсох буолан, оҕолорум үлэбэр тиийдэхтэринэ наһаа сэҥээрэрэ. Кыыһым кини баттаҕар, киэргэллэригэр ымсыырара, наар “Сардаана наһаа кырасыабай” диирэ. Уолум уһуйааҥҥа сылдьыбат эрдэҕинэ, үлэбэр илдьэ кэлэрим. Сардаанаҕа хааллара-хааллара, онно-манна наадабар сылдьарым. Ол кэмҥэ Сардаа, уолбутун эбиэттэтэн баран, күнүскүтүн утутан кэбиспит буолааччы.
Кини букатыннаахтык барбытын киһи өйө-санаата сатаан ылыммат, итэҕэйбэт. Олоҕу таптыыр да этэ, барар-кэлэр үгүс былааннааҕа. Ол барыта туолбатаҕа олус кыһыылаах, абалаах...
Розалия ТОМСКАЯ.
Киирэн кэлиэ диэн күүтэбин...
Сайыҥҥы кэмҥэ эрэдээксийэҕэ иккиэн эрэ хаалан үлэлиирбит. Сэрэдэ күн ууга-уокка түһүү, ыксал-тиэтэл үгүстүк буолара. Мин нэһиилэ сирэйбин суунан, баттахпын тараанан кэлэн олордохпуна, Сардаанам дьэрэкээн былаачыйалаах, уурбут-туппут курдук бүрүчүөскэлээх, таҥаһыгар-сабыгар барсар суумкалаах, бэрт холкутук долгулдьуйан киирэн кэлэрэ. Оччоҕуна хайдах эрэ уоскуйа түһэрим. Үлэ көҕү сөбүлүүр дииллэринии, кини баар күнүгэр ордук хорутуулаахтык, таһаарыылаахтык суруйарым.
Сардаана үлэтигэр олус бэриниилээҕэ. “Хаһыатым” диэн истиҥник ааттыыра. Киниэхэ чугас тиэмэни биэрдэххэ, хараҕа уоттана түһэрэ. Кими кытта кэпсэтэр буолбутун, хаһан көрсүөхтээхтэрин былаанныы, санаатын үллэстэ охсоро. Матырыйаала табылыннаҕына, ис-иһиттэн үөрэрэ, астынара. Итинник сытыы тиэмэлэргэ кини ордук арыллара, үлэтин үтүө түмүгүттэн үгүстүк үөрэрэ. Уопсайынан, Сардаана бэйэтэ миэстэтигэр тиийэн илэ хараҕынан көрөрүн, дьон санаатын хаһыат нөҥүө тиэрдэрин ордороро. Оннук булар-талар суруналыыс этэ.
Ааҕааччыларбыт “Сардаана Багынанова” диэн илии баттааһыннаах суруйуулары суохтаатахтара... Суруллубут суоруллубат. Кини итэҕэл, сиэр-майгы, о.д.а. тиэмэҕэ матырыйааллара сахалыы тыллаах суруналыыстыкаҕа бэлиэ суолу-ииһи хааллардахтара...
Эдьиийбит кэриэтэ саныыр Сардаанабыт бүтэһик остуолугар тиийэн олорон, “мама Сардаана” диир оҕолор сүүрэ-көтө сылдьалларын көрөн уоскуйбутум. Кини туһунан сылаас, истиҥ ахтыылары истэн, кини ситэ оҥорботоҕун тиһэҕэр тиэрдэр дьонноох эбит дии санаабытым.
... Сардаана көмпүүтэрэ хайдах тахсан барбытынан турар. Сороҕор субу үөрэн-көтөн, кэпсээн-ипсээн киирэн кэлиэ диэн күүтэбин. Иччитэх турар остуолун көрдөхпүнэ, итэҕэйиэхпин баҕарбаппын...
Айыына КСЕНОФОНТОВА.
Мэлдьи үөрэ-көтө сылдьара...
Санаан ыллахха, киһи барахсан бу орто туруу дойдуга ыалдьыт эрэ кэриэтэ олус кылгастык кэлэн барар.
Ол курдук күлүмнээн, элэҥнээн ааһар күннэрбитин, сылларбытын бүгүн эргиллэн, ааҕан көрбүтүм биһиги көлүөнэ номнуо биэһэн аҕыс, сорохторго биэһэн сэттэ кыраһа көмнөхтөөх хаарын түһэрэн эрдэхпит.
Аны оччо сыл олорбут киһи дьоллоох да буолуо этэ, ол эбэтэр икки тыһыынча аҕыс уон сылга диэри.
Биһиги көлүөнэ икки модун Үйэлэр алтыһыыларын, ол олох араас сүүрээннэрин билбит, көрбүт дьоллоохпут, өссө да эгэлгэ кэмнэри олоро түһүөхпүт турдаҕа.
Ол эрэн биһигини түмпүт, биир ситимҥэ сомоҕолообут үтүө доҕорбут Сардаана Багынанова барахсан сирдьит буолан испит олоҕун суола Күн сириттэн арахсан быстыбыта номнуо атырдьах ыйын уон аҕыс күнүгэр биир сыла. Бу суостаах-суодаллаах сурах былырыын Саха дьонугар ыар тыыннанан, ынчык саҥаланан былыта суох ыраас халлааҥҥа этиҥ ньиргийбитинии нүһэрдик иһиллибитэ.
Мэлдьи үөрэ-көтө, сырдык-ыраас сэмэй мичээрин бар дьонугар, доҕотторугар бэлэхтии сылдьыбыт үтүө киһибит силлиэ түһэн ааспытыныы, биирдэ сүтэн хаалбыта олус хомолтолоох, курус. Билигин кэм аастаҕын ахсын омос санааҕа, Дьокуускай будуллар олоҕун үөмэхтэспит дьонун быыһыттан Сардаана тахсан кэлэрэ буолуо диэн санаа кылам гынан ылааччы.
Ити ахтылҕан, суохтабыллаах санаа аны хаһан да салҕамматтыы быстыбытын өйдөөтөхпүнэ дириҥник үөһээ эрэ тыынабын. Ол курдук соһумардык Дьылҕа Хаан эргиллибэттии, төннөрбөттүү быраман сахтарга симэлитэн илдьэ бардаҕа.
Сардаана Багынанованы кытта хаһан билсибиппин өйдөөбөт эбиппин. Биир идэлээх буоламмыт араас тэрээһиннэргэ, мунньахтарга, семинардарга мэлдьи алтыһан быстах аҕыйах да тылынан буоллар үлэ хаамыытын ыллыгынан кэпсэтэн ааһар буоларбыт.
2019 сыл тохсунньутугар ватсаабым муннугар 1982 сыллаах группа диэн страница арыллан кэлбитин көрбүтүм, Сардаана тэрийбит группата буолан биэрдэ. Онно дьэ билбитим, Сардааналыын аны биир сыллаах көлүөнэ эбиппитин. Бу дьыл сааһыгар Сардаана салалтатынан чугас улуустар түмсүүлэригэр айаннаан тиийэн кыттыыны ылан, тус ыра санаатын үөлээннээхтэрин кытта үллэстэн, далааһыннаах модун үлэлэр олус кылгас кэм иһигэр тэриллэ түспүттэрэ.
Саха сирин улуустарыгар тус лидердэр баар буолбуттара, ол улуус тумус дьоннорун түмэн Туймаада хочотугар сүбэ мунньахтар ыытыллан араас хайысханан күүрээннээх үлэлэр, хамсааһыннар тэриллибиттэрэ.
Ол курдук үгүс улуустарга, Дьокуускайга элбэх оҕолоох аҥардас күн - күбэй ийэлэргэ, ытык кырдьаҕастарга, приюттарга, интернаттарга
уо.д.а киэн далааһыннаах көмөлөрү тэрийэн ыыппыта. Онтон ыла 1982 сылга оскуоланы бүтэрбит үөлээннээхтэр билсэн-көрсөн доҕордоһон, олоххо алтыһыылара күн бүгүҥҥэ диэри салҕанан баран иһэр.
Сардаана Багынанова тэрийэр дьоҕура, ыра санаата киэҥ этэ. 2020 сыл олунньутугар Дьокуускайга, улуустарга тэрийбит активтарын түмэн, сүбэлэһэн "Оҕо дыбарыаһын" киэҥ уораҕайыгар Саха Сирин оскуолаларын 1982 сыллаахха бүтэрбит выпусниктар улахан кэнсиэрдэрин тэрийбиппит.
Залга баппат куорат олохтоохторо бу кэнсиэри дуоһуйа көрөн, астынан тарҕаспыттара. Манна киирбит үбү олоччу Дьокуускай куоракка сынньалаҥ пааркатыгар Саха Сирин оскуолаларын 1982 сыллаахха бүтэрбит выпусниктар түмсэн сынньанар, кэпсэтэн-ипсэтэн ааһалларыгар анаан беседка тутуутун тэрээһинигэр анаабыппыт. Ол беседкабыт үөлээннээхтэр сомоҕолорунан оҥоһуллан, паркаҕа түмсэр сирдэммиппит олус үчүгэй.
Сардаана Багынанова талан ылбыт идэтигэр олох чаҕылхай сулус кэриэтэ ойуччу, ураты көрүүлээх, киэн суоллаах-иистээх, дьон болҕомтотун тардар ураты буочардааҕа. "Киин куорат" хаһыат балаһаларыгар олус сонун, дириҥ ис хоһоонноох ыстатыйалара, сороҕор сытыы тыллаах - өстөөх, сыыһаны - халтыны утары, уот харахха баарынан суруйан ааҕааччыларын дириҥ итэҕэллэрин ылар дьиҥнээх суруналыыс этэ.
Үөлээннээхпит, Сардаана Багынанова олорон ааспыт олоҕун суолун бэлиэтэ симэлийбэккэ сырдык сулус буолан чаҕылыйа турдун! Сытыы бөрүөтүн көмүс суруктара үйэ саас тухары бар дьон сэҥээриитин тарда турдуннар! Киһи буолан олордубут маһа тоҕус үйэлэри уҥуордаан, орто туруу дойдуга чэчирээтин үйэлэргэ!
Үөлээннээҕэ, биир идэлээҕэ,
Россия суруналыыстарын сойууһун чилиэнэ,
Саха НКИК 2009-2019 сылларга "Байанай" биэрии автора, ыытааччыта, редактора Иннокентий АРТАМОНОВ.
Үлэтинэн олорбута
Аан маҥнай үлэлии киириэхпиттэн ыстатыйа, суруйуу хайдах буолуохтааҕын, хаһыат хайдах таҥылларын барытын кэпсээн, үөрэтэн, суруналыыстыка суолугар сирдээбит киһи Сардаана Ивановна буолар. Хас биирдии матырыйаалы ырытан, сыаналаан көрөрө. Мин суруйууларбар маҥнай туохха сыыһарбын, тугу ситэ арыйбатахпын хайаан даҕаны быһааран биэрэрэ. Хаһан даҕаны кыыһыран тымта, быраҕаттана сылдьарын көрбөтөҕүм. Мэлдьи наһаа кырасыабай таҥастаах, баттаҕа көбүс-көнө, куруук мааны буолааччы, аны элэккэйэ, майгылаах бастыҥа этэ.
Сардаана тас дойдуну үгүстүк кэрийэрэ, атын омуктар олохторун-дьаһахтарын, култуураларын олус ытыктыыра, интэриэһиргиирэ, хаһыатыгар тиһигин быспакка сырдатара. Ханна эмит баран кэллэҕинэ, бииргэ үлэлиир кэллиэгэлэригэр куруук илии тутуурдаах, өттүк харалаах сылдьааччы. Турцияттан, Москубаттан, Питертэн өйдөбүнньүк сүбэниирдэри мэлдьи аҕалара.
Сардаана Ивановна, чахчы, үлэтинэн эрэ олорбута, үлэтигэр олус бэриниилээҕэ. Дьон кыһалҕатын, тыын боппуруоһун быһаарартан соло булбата. Кини “суох” диэн тылы төрүт туттубат үгэстээҕэ. Барытыгар саба түсүһэн, сөбүлэһэн иһэр үгэстээҕэ. Эрэдээксийэҕэ куруук хойукка диэри хаалан үлэтин түмүктүүрэ, сыалын ситиһэрэ...
Айталина СОФРОНОВА.
Имигэс үҥкүүһүт, суруйар талаан барыта баара...
Дьүөгэм, кылааһынньыгым Сардаана оскуола сааһыттан суруйар талааннааҕа. Боотулуу оскуолатын иһинэн "Сарыал" ансаамбыл биллэр-көстөр, имигэс үҥкүүһүтэ этэ. Игирэтэ Саргылааналыын оскуола кэннэ күннээх Узбекистаҥҥа 10-ча сыл үөрэнэн, үлэлээн кэлбиттэрэ. Хас да омук тылын баһылаабыттара. Сахаларын сиригэр төннөн кэлэн, суруналыыстыканы өрө туппуттара.
Сардаана “Киин куорат” хаһыакка суруналыыһынан бэрт өр кэмҥэ үлэлээбитэ. Сүрүн суруйар тиэмэтэ социальнай хайысхалаах буолара. Хаһыатыгар араас, сонун ааксыйалары ыытара, анал ааптарыскай балаһалардааҕа. Тыа сирин олоҕун киэҥник сырдатара. Суруйар дьоҕура, тиэмэтэ ааҕааччыга олус чугаһа, өйдөнүмтүөтэ. Суруналыыс ыарахан идэтигэр, чахчы да, бэриниилээхтик үлэлээбитэ. Миигиттэн тыа сирин олоҕун суруйарбар көрдөһөрө. Онно суруйууларбын сүбэлиир да, сэмэлиир да түгэннэрэ бааллара “суруйаргар сахалыы тыллары хаһан даҕаны нууччалыы суруйбат буол” диэн сүбэлиирэ, ирдиирэ. Төрөөбүт тылын үрдүктүк тутара, ытыктыыра. Ол курдук син балай эмэ суруйууларбын хаһыатыгар таһаартаабыта. Миигин суруйар идэҕэ лаппа уһуйан испитэ баара... Кылаас көрсүһүүтүгэр, “Үлэбэр көмөлөһөр баар суох киһим”, – диэн сыллаан ылбыта. Ол миэхэ улахан хайҕабыл этэ. Ол бэйэтэ аны суох. Хаарыан кыыс, бу олохтон эрдэ да бараахтаата...
Боотулуу оскуолатыгар бииргэ үөрэммит дьүөгэтэИзабелла ТИМОФЕЕВА.
* * *
Айар дууһалаах киһи санаата саппаҕыран, дууһата айманан, уостар-кэхтэр кэмигэр айымньыта табыллыбат, үлэтэ таһаарыыта суох буолар. Оннук олоҕум уустук, ыарахан кэмигэр үлэбэр мэлдьи өйөөбүт, өйүүр тэрилтэбэр “Ситим-медиа” бөлөххө, тапталлаах “Кыым” хаһыатым эрэдээксийэтигэр, бары кэллиэгэлэрбэр үйэлэргэ умнуллубат махталбын тиэрдэбин. Эһиги баар буолаҥҥыт, аҥаарбын, игирэбин, САРДААНАбын сүтэрбит, дууһа ыар кыланыылаах тургутуутун аһардабын, олоххо тулуурум, дьулуурум уостубат.
Игирэтэ Саргылаана БАГЫНАНОВА.
