Саха сирин Ил Дархана Айсен Николаев 2022 сылы Ийэ сылынан биллэрбитэ. Ил Түмэҥҥэ туһаайыытыгар кини ийэлэр олохторуттан бүтүн уопсастыба олоҕо тутулуктаах диэн эппитэ уонна ийэлэргэ улахан болҕомтону уурарга ыҥырбыта.
«Утум» (Наследие) өрөспүүбүлүкэтээҕи уопсастыбаннай тэрилтэ эдэр суруналыыстарга "Призвание – Мама" Бүтүн Арассыыйатааҕы куонкуруһу биллэрэр. Бу куонкурус Арассыыйа регионнарын сырдатар-иһитиннэрэр эйгэлэрин салайааччыларын альянса (АРС-Пресс) кыттыылаах ыытыллар. Куонкурус СӨ Бырабыыталыстыбатын дьаһалынан бигэргэммит Ийэ сылыгар аналлаах тэрээһиннэр тосхоллоругар киирбитэ.
"Призвание – Мама" куонкурус эдэр суруналыыстары көҕүлүүр, саҥа ааттары киэҥ эйгэҕэ таһаарар уонна ийэлэр кыһалҕаларгар уопсастыба болҕомтотун тардар соруктаах.
Тэрийээччилэр суруйар дьоҕурдаах ыччаты, эдэр суруналыыстары, устудьуоннары, куонкуруска көхтөөхтүк кыттыҥ, Ийэ сылыгар ийэлэри сырдатыыга тус кылааккытын киллэриҥ диэн ыҥыраллар.
Куонкурус балаһыанньата «АРС-Пресс» альянс саайтыгар https://arspress.ru/ тахсыаҕа. Сайаапкалары тутуу от ыйын 1 күнүттэн балаҕан ыйын 30 күнүгэр барыаҕа. Түмүк сэтинньи 30 күнүгэр тахсыаҕа.
