Интернеккэ, араас саайтарга, пабликтарга, Украинаҕа буола турар быһыыттан-майгыттан сылтаан дуу, хайдах дуу, дойдубут үгүс «сулустара» Арассыыйаттан атын дойдуларга барбыттар.
Сорохтор эрдэттэн былааннаммыт уоппускабытыгар бардыбыт дииллэр эбит, оттон атыттар олох даҕаны төттөрү кэлэр билиэтэ суох көппүттэр.
Ксения Собчак Израильга көппүт
Бастакынан «сынньана барбыт» дьоннортон биирдэстэринэн Ксения Собчак буолбут. Кини 5 саастаах уолун кытта Арассыыйаттан Турцияҕа биисинэс кылааһынан көппүтүн туһунан сурах кулун тутар 2 күнүгэр биллибит. Оттон, кэнники ситимнэргэ таһаарыыларыттан көрдөххө, кини оҕотун кытта Бунг-Гурион диэн Тель-Авив аэропуордугар турарын хаартыскаҕа түһэрбиттэр.
Ол эрээри Собчак бэйэтэ этэринэн, кини ханна даҕаны куоппат эбит.
«Миэхэ ханнык даҕаны атын гражданство, “тупичоктар” уонна яхталар суохтар...» - диэн тэлэбиидэнньэ үлэһитэ эппит.
Тохтуу түһэн баран, Шереметьево аэропуорка, Тель-Авивка тиийэр эриэйсинэн көтөөрү турар Собчак кэргэнин, биллиилээх режиссеру Константин Богомолову өйдөөн көрбүттэр.
Ол аата, кинилэр дьиэ кэргэнинэн тэҥҥэ каникуллуу сылдьаллар быһыылаах диэн суруйбуттар.
Режиссер «Малая Бронная» диэн тыйаатырга художественнай салайааччынан үлэлиир уонна «Дядя Лева», «На всякого мудреца довольно простоты» диэн испэктээхтэргэ оонньуур эбит. Онон, Константин Юрьевич сэҥээрээччилэрэ сэрэйэллэринэн, кини «куотар» кыаҕа суох.
Оттон Алла Пугачева хайаспытый?
Биир нэдиэлэ анараа өттүгэр Алла Пугачева уонна Максим Галкин Арассыыйаттан көппүттэрин туһунан сурах тарҕаммыт. Божена Рынска диэн суруналыыс бэйэтин пуостугар таһаарбытынан, Примадоннаны оҕолорун илдьэ Внуково-3 аэропуорка сылдьалларын көрбүттэр. Сабаҕаланарынан, кини чааһынай эриэйси туһаммыт. Super издание суруйарынан, кини дьиэ кэргэнинээн Израильга көппүттэр эбит.
Аар саарга аатырбыт ырыаһыппыт көтүөн иннинэ, кэргэнэ Максим Галкин Донбасска буола турар быһыыны-майгыны өйөөбөтөҕүн туһунан биллэрбитин кэнниттэн, юморист патриоттуу өйдөөх-санаалаах бокулуонньуктара Архангельскайга буолуохтаах кэнсиэрин билиэтин төнүннэрбиттэр. Түмүккэ, Максим Галкин кэнсиэрэ тохтотуллубут, оттон Казань куоракка былааннаабыт гостуруола онуоха-маныаха диэри көһөн биэрбит. Маны таһынан, араас саайтарга, таһаарыыларга сырдаппыттарынан, кини Украинаҕа буола турар байыаннай эпэрээссийэни сөбүлээбэтэҕин туһунан биллэрбитин иһин, хас даҕаны эрэкэлээмэҕэ кыттыахтаах хантыраактарыттан маппыт.
Даҕатан этэр буоллахха, Примадонна эмискэ көтөн барбыта биир атын биричиинэлээх буолуон сөп. Кини кулун тутар хас бүтэһик өрөбүлүн ахсын Саһархай сибэкки күнүн эбэтэр Саас күнүн бырааһынньыктыыр идэлээх эбит. Ити күннэри кини бэйэтэ толкуйдаабыта биллэр.
Александр Васильев, Рената Литвинова уонна Земфира Парижка тиийбиттэр
«Модный приговор» биэрии ыытааччыта Александр Васильев Арассыыйаттан парижка туруммутун туһунан сурах биллибитэ. Кини онно 1982 сыллаахтан олорор бэйэтин дьиэтигэр төннүбүт эбит.
«Дьылҕа кыһарыйан, миигиттэн тутулуга суох биричиинэлэртэн сылтаан, мин манна, бэйэм 15-с кыбаарталга баар дьиэбэр кэллим», - диэн Александр Васильев в социальнай ситимнэригэр таһаарбыт.
teleprogramma.pro саайка интервьюга суруллубутунан, кини Париж устун номнуо борогуулкалаабыт уонна Коньяк-Же, Карнавале диэн икки түмэлгэ сылдьыбыт.
«Только никому» диэн телеграм-ханаалга суруллубутунан, бу уустук кэми аһардар туһуттан, Франция киин куоратыгар Земфира дьүөгэтинээн Рената Литвиновалыын тиийбиттэр.
Кинилэр бу айаннара төһө уһун болдьохтоох буоларын бэйэлэриттэн ураты ким даҕаны билбэт.
Поргиналаах Бородина Дубайга уонна Турцияҕа бааллар
Оттон тэлэбиидэнньэ биир «сулуһа» Ксения Бородина Дубайга уоппускаҕа тиийбит. Кинини маннык ыарахан кэмҥэ дойдутуттан куоппут диэн дьон сирэй-харах анньыбыттара биллэр. Маныаха, Ксения хейтердэригэр туһаайан, Донбасс оҕолоругар хаста даҕаны көмөлөспүтүм уонна ол көмөм туһунан ханна даҕаны киһиргээн сырдаппатаҕым диэн этиммит. Онон, миигин кириитикэлииргитин оруна суоҕунан ааҕабын диэн Бородина суоһурҕаммыт.
Маны таһынан, биллиилээх артыыска, Николай Караченцов огдообото Людмила Поргина Турцияҕа тиийбит. Маныаха, кини Арассыыйаттан куотар санаата суоҕун уонна бу былааннаммыт сынньалаҥҥа сылдьарын туһунан чопчулаан эппит.
«Пятый канал» ханаалга тахсыбыт интервьюга, Людмила Поргина кыраныысса таһыгар олунньу 25 күнүгэр, ийэтэ суох буолбут уонна Николай Караченцев оһолго түбэспит ыар күннэригэр анаан тиийбитин туһунан эппит.
«Бу миэхэ Сибэтиэй күн. Мин бу манна, Николаҕа айаннаан кэлэн баран, Николай Чудотворецка уонна бу олохтон барбыт чугас дьонум туһугар үҥэбин», - диэн Людмила Поргина суруналыыстарга кэпсээбит.
Эммануил Виторган уонна Антон Долин Латвияны булбуттар
Украинаҕа буолбут анал байыаннай эпэрээссийэ саҕаламмытын нөҥүө күнүгэр, Эммануил Виторган Арассыыйаттан дьиэ кэргэнин илдьэ тэскилээбит. Биллиилээх артыыс дьонун кытта Юрмалаҕа тиийбит. Бу кэнниттэн, Эммануил Виторган социальнай ситимҥэ Москубаҕа хаалбыт докумуоннарын ирдээн, сурутааччыларыттан көмө көрдөөбүт.
Маны таһынан, дойдубутуттан Григорий Лепс оҕолорун илдьэ соҕуруу дойдуга туруммут. Кини соторутааҕыта ханна эрэ паальмалардаах сиргэ турар хаартыскаларын социальнай ситимигэр таһаарбыт. Маныаха артыыс чопчу ханна тиийбитин туһунан тугу даҕаны эппэтэх.
Арассыыйаттан атын дойдуга туруммутун туһунан «Теснота» уонна «Дылда» киинэлэр режиссердара Кантемир Балагов бэйэтин инстаграмыгар таһаарбыт. Атын «сулустар» уоппускаҕа, сынньана бардыбыт диэн эппит эбит буоллахтарына, кини бэйэтин тус санаатын маннык этиммит:
«Биһиги Арассыыйаттан бардыбыт. Биһиги олус хомойдубут уонна дириҥник улугурдубут. Биир түгэн иһигэр биһиги инникибитин былдьаатылар. Биһиги олохпутун уордулар. Биһигиттэн төрөппүттэрбитин уонна доҕотторбутун былдьаатылар. Ол эрээри биири ылбатылар – киинэни», - диэн режиссер бэйэтин инстаграмыгар хомойбут санаатын этиммит.
Биллэринэн, Кантемир Балагов НВО ханаалга анаан көмпүүтэринэй оонньуулар матыыптарынан «Одни из них» диэн сэрийээли устан бүппүт, онон, кини талыытын өйдүөххэ сөп диэн суруйбуттар.
Ону таһынан, Вера Полозкова поэтесса Арассыыйаттан атын сиргэ бараары сылдьарын туһунан социальнай ситимнэригэр биллэрбит. Кини оҕолорун илдьэ, доҕотторун кытта букатыннаахтык быраһаайдаһан атын сиргэ турунаары сылдьарын ыарыылаахтык ылыммытын туһунан этиммит.
Маны таһынан, биллиилээх киинэ кириитигэ Антон Долин буола турар быһыыттан-майгыттан сылтаан Арассыыйаттан Латвияҕа тиийээри сылдьарын туһунан биллэрбит.
Туһаныллыбыт саайт сигэтэ: https://teleprogramma.pro
