РФ Үөрэхтээһиҥҥэ миниистирэ Сергей Кравцов Арассыыйа Дьоруойа, «Время Героев» тосхол кыттыылааҕа, ыччат уонна социальнай коммуникация миниистирин э.т. Игорь Юргины РФ Үөрэхтээһиҥҥэ министиэристибэтин биир тутаах Департаменын салайарга ыҥырбыт.
«Айсен Сергеевич, Арассыыйа Дьоруойа Игорь Васильевич Юргин Иитии бэлиитикэтин департаменын салайааччыта буоларыгар сөбүлэҥҥин биэрэргэр көрдөһөбүн. Кини эн салайыыгынан улахан уопуту ылла, үрдүк идэтийбит таһымнааҕын, дойдутун уонна өрөспүүбүлүкэтин туһугар үлэлиир баҕалааҕын көрдөрдө. Бэрэсидьиэн Игорь Юргин курдук Дьоруойдар үөрэх эйгэтигэр үлэлии киирэллэригэр, тус холобурдарынан оҕолорбутун иитиигэ кытталларыгар баҕарарын эппитэ», – диэбит Сергей Сергеевич.
Санатар буоллахха, штурм этэрээтин хамандыыра, майор Игорь Юргин Алдан улууһун Аллараа Кураанах бөһүөлэгиттэн төрүттээх. Кини анал байыаннай дьайыыга саҕаланыаҕыттан кыттыбыта. Онно этээритин кытта өстөөх алта элитнэй подразделениетын үлтүрүппүтэ. Былырыын Бэрэсидьиэн Ыйааҕынан Арассыыйа Дьоруойун аатын сүкпүтэ. Маны сэргэ Эр санаа уордьанынан иккитэ уонна «За отвагу» мэтээлинэн наҕараадаламмыта.
