Хаҥалас улууһугар эр киһиттэн 2021 с. Кирэдьиитинэн атыыласпыт массыынатын судаарыстыба туһатыгар былдьаатылар. Улуус борокуратуурата Жатай олохтооҕор туһаайыллыбыт буруйдааһыны өйөөтө.
Суукка биллибитинэн, буруйданааччы кулун тутар 8 күнүгэр ойоҕун кытта кыыһырсыбыт. Ойоҕо кини бэлэхтээбит сибэккитин дьөрбөтүн сирбит эбит. Ол кэннэ эр киһи Мохсоҕоллоох бөһүөлэгэр доҕотторугар тиийэн арыгылаабыт.
Төннөн иһэн, итирик туруктаах буолан, массыынатынан суол ханаабатыгар түспүт. Полиция үлэһиттэрэ кэлбиттэригэр куота сатаабыт. Онон, кинини РФ УК 264.1 ыст. 1 ч. 200 чаастаах күһэлэҥ үлэҕэ уурдулар уонна массыына ыытар быраабын балтараа сылга быстылар.
Сонун төрдө: CӨ Борокуратуурата
