Сэбиэскэй уонна арассыыйыскай диктор Виктор Балашов 96 сааһыгар күн сириттэн туораата, диэн иһитиннэрдэ “Россия 24” ханаал.
Виктор Балашов Москва куоракка, ахсынньы 24 күнүгэр 1924 сыллаахха төрөөбүтэ. Аҕа Дойду Улуу сэриитин кыттыылааҕа, 1942 сыллаахха тус баҕа санаатынан Кыһыл Аармыйаҕа сулууспалыы барбыта. 1944 сыллаахха, үс бааһырыы уонна контузия кэнниттэн Бүтүн сойуустааҕы араадьыйаҕа үлэтин саҕалаабыта.
Балашов МХАТ иһинэн арыллыбыт ( Алла Тарасова куурса) Ыччат тыйаатырдааҕы устуудьуйатын бүтэрбитэ.1947 сылтан 1996 сыллаахха диэри Киин тэлэбиидэнньийэҕэ үлэтин саҕалаабыта.
Диктор «Время», «Победители», «Огонек» уонна да атын биэриилэри ыытан кэлбитэ. 1961 сыллаахха, муус устар 12 күнүгэр кини бастакынан тэлэбиидэнньийэ эпииригэр Юрий Гагарин космоска көппүтүн туһунан биллэрбитэ. Ону таһынан документальнай уонна уус-уран киинэлэргэ тастан саҥарарара.
1997 сыллаахха Балашов Арассыыйа норуодунай артыыһын аатын ылбыта, 2015 сыллаахха кинини култуура, ускуустуба, тэлэбиидэнньийэ уонна бэчээт сайдыытыгар үтүө өҥөлөрүн иһин Бочуот уордьанынан наҕарадалаабыттара.
Сэрии иннинэ Балашов самбонан дьарыктаммыта, успуорт маастарын аатын ылбыта уонна Москва куорат чөмпүйүөнүнэн буолбута. Бүтүн Арасыыйатааҕы самбо федерацията кини суох буолбутугар дириҥ кутурҕанын биллэрдэ.
