Муус устар 1 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр, “Дьээбэрэҥ-2019” өрөспүүбүлүкэтээҕи көр-күлүү куоҥкуруһа номнуо 25-с төгүлүн ытылынна. Куоҥкуруһу төрүттээччи СӨ ускуустубатын үтүөлээх деятелэ, эстрада артыыстарын Бүтүн сойуустааҕы куоҥкурус лауреата, режиссер, сценарист, ааптар, учуутал, Аллараа Халыма улууһун бочуоттаах олохтооҕо Иван Иванович Бурцев буолар.
Иван Иванович үгүс режиссердары, айар кэллэктииптэр салайааччыларын, култуура училищатын уһуйааччыларын (билигин култуура уонна ускуустуба колледжа) иитэн, үөрэтэн таһаарбыта. Кини үөрэнээччилэрэ өрөспүүбүлүкэ араас муннугар ситиһиилээхтик үлэлии-хамныы сылдьаллар.
1987-2005 сылларга Иван Бурцев Судаарыстыбаннай филармония уус-уран салайааччытынан үлэлээбитэ.
1989 сыллаахха үөрэнээччитин, билигин Үүнэр көлүөнэ тыйаатырын уус-уран салайааччытын, СӨ народнай артыыһын Алексей Павловы кытта эстрада артыыстарын Бүтүн сойуустааҕы 11-с куоҥкуруһугар кыттан лауреат буолбуттара. Онно Алексей Павлов “Мы народ особый – мы северяне”, “Иллээхэй” о.д.а. Иван Бурцев суруйбут монологунан ситиһиилээхтик кыттыбыта. Иван Иванович сахалыы, нууччалыы тылынан миниатюралары суруйара.
1994 сыллаахха “Дьээбэрэҥ” өрөспүүбүлүкэтээҕи көр-күлүү куоҥкуруһун тэрийбитэ. Бу куоҥкурустан Аркадий Новиков, Кирилл Мартынов, Петр Черкашин, Константин Третьяков, Туйаара Стручкова, Иван Касьянов курдук биллэр артыыстар тахсыбыттара. “Дьээбэрэҥ” 20 тахса сыл тохтоло суох ыытыллыбытын түмүгэр, өрөспүүбүлүкэ үрдүнэн хас да норуот тыйаатырдара, айар кэллэктииптэр тэриллибиттэрэ. Ол курдук, “Көөчөөн көрдөрө”, тэрийээччи СӨ култууратын үтүөлээх үлэһитэ Аркадий Новиков, “Дьиикимдэ дьээбэлэрэ” (Горнай улууһа, Дьиикимдэ нэһ.), “Дэриэбинэчээннэр” (Кэбээйи улууһа, Мукучу народнай тыйаатыра) уонна “Бээдьи бэтиэхэлэрэ” (Уус Алдан улууһа), “Айтал” (Амма улууһа), “Чолигда” (Жиганскай улууһа) о.д.а. айар кэллэктииптэр.
“Дьээбэрэҥ-2019” түмүгэ:
“Тэбэнэттээх күлүү” — Слепцов Юрий Алексеевич (Муома улууһа, Чуумпу-Кытыл);
“Кэскиллээх толорооччу” – Старостин Ваня (Уус Алдан улууһа, салайааччы Алексеева Аграфена Асклифедотовна);
“Уу-чу-кучук” – Мичийээнэ Иванова (Бүлүү улууһа, салайааччылар Алексеева Мария Степановна, Иванова Сардана Петровна);
“Бастыҥ дебют” – “Күлбэйэ” (Бүлүү улууһа, Тыымпы, салайааччы Боронова Сардана Прокопьевна);
“Бастыҥ конферансье” – Новиков Иван Степанович (Нам улууһа);
“Бастыҥ көрдөөх үҥкүү” – Иванов Владимир Русланович (Сунтаар улууһа);
“Бастыҥ оригинальнай нүөмэр” – “Дэриэбинэчээннэр” (Кэбээйи улууһа, салайааччы Иванова Саргылана Егоровна);
“Бастыҥ эксцентрика” – “КМС” (Горнай улууһа, Бэрдьигэстээх);
“Бастыҥ пародия” – Садовников Василий (Чурапчы улууһа, Мындаҕаайы народнай тыйаатыра);
“Бастыҥ музыкальнай нүөмэр” – Новикова Екатерина, Птицын Иннокентий (Дьокуускай);
“Бастыҥ көрдөөх ырыа” – “Дьиикимдэ дьээбэлэрэ” (салайааччы Егоров Владимир Владимирович);
“Бастыҥ көрдөөх фольклор” – “Юморина” (Анаабыр улууһа, Үрүҥ-Хайа, салайааччы Спиридонова Наталья Анатольевна);
“И.И. Бурцев айымньытынан толоруу” – Сазонов Данил Дмитриевич (Мындаҕаайы народнай тыйаатырын артыыһа, Чурапчы улууһа);
“Көрдөөх көккөттөр” – “Хоросо” (Үөһээ Бүлүү улууһа, Хоро, салайааччы Касьянов Иван Вадимович);
“Көрүдьүөстээх көөчөөннөр” – “ТЫТС” (Чурапчы улууһа, Төлөй, салайааччы Смирников Михаил Викторович);
“Күргүөмүнэн кыттыы” – “Абытай кыргыттар” (В. Николаев аатынан Сунтаардааҕы народнай тыйаатыр, салайааччы Григорьева Екатерина Афанасьевна);
“Кута-Мата Куо” – Көрдөөх куолар (Ленскэй оройуона, салайааччы Индеева Сардана Егоровна);
“Хомоҕой тыл хоһууна” – Попов Иннокентий Петрович (Уус Алдан улууһа, Суотту);
“Көрдөөх кэпсээн кэһиилээх” – Мартынов Кирилл Дмитриевич (Горнай улууһа, Бэрдьигэстээх);
“Бэртээхэй бэтиэхэ” – “Айуу чэ” (Ньурба улууһа, Антоновка, салайааччы Матвеева Ньургуяна Владимировна);
“Сытыы бөрүө” – Степанов Пантелеймон Иннокеньтевич (Дьокуускай);
“Күндү күлүүк” – Секова Лиана Федеровна (“Абытай кыргыттар”, В. Николаев аатынан Сунтаардааҕы народнай тыйаатыра);
“Көрүдьүөһү күөттээччи”(бастыҥ эр киһи оруола) – Егоров Владимир Владимирович (Горнай улууһа, Дьиикимдэ);
Гран-при – “Чолигда” (Жиганскай улууһа, салайааччы Егорова Туяра Владимировна).
Кыайыылаахтар 50 тыһ солк харчынан бириэмийэни туттулар.
