Бэс ыйын 20 күнүттэн ХИФУ сүрүн куорпуһугар абитуриеннартан докумуоннары тутуу саҕаланар. Бу туһунан университет пресс-сулууспата иһитиннэрэр.
“Докумуоннары бакалавриакка уонна бүддьүөт миэстэтигэр туттарсыы түмүгүнэн от ыйын 10 күнүгэр диэри тутуохтара. От ыйын 26 күнүгэр диэри бүддьүөт миэстэтигэр БКЭ түмүгүнэн докумуоннары хомуйуохтара. Бүддьүөт миэстэтигэр магистратураҕа докумуоннары от ыйын 19 күнүгэр диэри тутуохтара. Оттон бакалавриат, специалитет уонна магистратура бырагыраамматынан төлөбүрдээх кэтэхтэн үөрэниэн баҕалаахтар докумуоннарын алтынньы ый 11 күнүгэр диэри туттарыахтарын сөп ”, — диэн университет пресс-сулууспата иһитиннэрэр.
Университет иһинэн орто үөрэх кыһаларыгар аттестат түмүгүнэн бүддьүөт уонна төлөбүрдээх миэстэлэргэ туттарсыы атырдьах ыйын 15 күнүгэр диэри ыытыллар. Аспирантураҕа бүддьүөт уонна төлөбүрдээх миэстэлэргэ от ыйын 1-21 күннэригэр сайабылыанньалары хомуйуохтара. Оттон ординатураҕа от ыйын устата докумуоннары тутуохтара.
“Үөрэх кыһаларын сүүмэрдиир хамыыһыйалара ХИФУ сүрүн куорпуһугар баар буолуохтара. Филиаллар эмиэ бэс ыйын 20 күнүттэн үлэлэрин саҕалыахтара”, – диэн ХИФУ киин хамыыһыйата иһитиннэрэр.
