Киин куорат борокуратуурата түөлбэлэри тупсарыыга куорат мээрин быстах кэмҥэ солбуйааччы Евгений Григорьев дуоһунаска ананыытыгар сокуону кэһии баарын булла. Бу туһунан өрөспүүбүлүкэ борокуратууратын пресс-сулууспата иһитиннэрэр.
Бэрэбиэркэ түмүгэ көрдөрбүтүнэн, сокуон ирдиирин курдук, Евгений Григорьев үлэҕэ киирэригэр бэйэтин уонна дьиэ кэргэнин дохуотун, баайын-дуолун туһунан, итиэннэ интэриниэккэ саайтарын туһунан иһитиннэриилэри биэрбэтэх. Маны таһынан, кини дуоһунаска ананарыгар биэс кэммиэрчэскэй тэрилтэни салайыыга сыһыаннааҕа биллибит.
Инньэ гынан, борокуратуура модьуйуутунан, Евгений Григорьевы кытары үлэ дуогабара тохтотулунна, дуоһунаһыттан босхолонно.
