Сэтинньи 27 күнүгэр РФ Бырабыыталыстыбатын бэрэссэдээтэлин солбуйааччы – РФ бэрэсидьиэнин Уһук-Илиҥҥэ боломуочуйалаах бэрэстэбиитэлэ Юрий Трутнев, Ил Дархан Айсен Николаев уонна ыҥырыылаах ыалдьыттар, “Хотугу сулус” муус куоратыгар сырыттылар. Бу туһунан СӨ Бырабыыталыстыбатын пресс-сулууспата иһитиннэрэр.
“Дэлэгээссийэ чилиэннэрэ “Саха сирин бриллианнара” диэн норуоттар икки ардыларынааҕы муус уонна хаар оҥоһук куоҥкуруһун кыттыылаахтарын кытта көрүстүлэр. Ону таһынан, мууһунан оҥоһуллубут Уһук Илиҥҥи федеральнай уокурук хаартатын көрдүлэр. Онно бэйэлэрин эрэгийиэннэрин былааҕын туруордулар. Ол кэнниттэн паарка муус уонна хаар оҥоһуктарын көрдүлэр”, – диэн иһитиннэриигэ суруллар.
Сэтинньи 25-30 күннэригэр “Хотугу сулус” пааркаҕа муус уонна хаар оҥоһуктар куоҥкуруһа ыытыллар. Саха маастардарын кытта Канадаттан, Монголияттан, Кытайтан, Беларусияттан, Алтайскай кыраайтан, Хабаровскай, Красноярскай уонна Магадан куораттартан кытталлар.
