Бүгүн, ахсынньы 25 күнүгэр Табаҕа тумуһугар баар “Улуу Тоҕой” этно-култуурунай комплекс үөрүүлээх арыллыыта буолан ааста.
Ол курдук, “Улуу Тоҕой” бастакы ыалдьыттарынан Табаҕа орто оскуолатын 5-7 кылааһын үөрэнээччилэрэ буоллулар. “Ситим” медиа-бөлөх доруобуйаларыгар хааччахтаах уонна олох ыарахаттарыгар түбэспит оҕолорго анаан Саҥа дьыллааҕы алыптаах күнү бэлэхтээтэ. Оҕолор Тымныы Тойону уонна кини сиэнин Хаарчаананы кытта көрүстүлэр. Ону таһынан, үгүс оҕолор сөбүлээн көрөр паук-киһини кытта оонньоотулар-көрүлээтилэр, “Астык” сахабургер амсайдылар уонна буоларын курдук Тымныы Тойонтон минньигэс бэлэхтэри уонна махтал суруктары туттулар.
Табаҕа орто оскуолатын дириэктэрэ Надежда Александровна Шилова: “Бүгүн биһиэхэ бэлиэ күн буолла. “Улуу Тоҕой” саҥа этно-комплекс бастакы ыалдьыттара буолбуппутуттан олус үөрдүбүт. Тэрийээччилэргэ – “Ситим” медиа-бөлөх кэллэктиибигэр улахан махталбытын тиэрдэбит. Бүгүн манна тиийиммэт-түгэммэт ыаллар уонна доруобуйаларыгар хааччахтаах оҕолор кэллилэр. Хомойуох иһин, 45 кыраадыс тымныы буолан 5-с кылаастарга үөрэх күнэ буолбата. Ол да буоллар, оҕолор төрөппүттэрин кытта кэллилэр. Комплекс дьиэтин иһэ олус кэрэтик уонна интэриэһинэйдик оҥоһуллубут. Оҕолор ордук бөрөлөр чуучулаларын сэҥээрдилэр, тутан-хабан көрдүлэр. Таһырдьа сэлиилэри кытта хаартыскаҕа түстүбүт. Социальнай ситимҥэ көрөн баран "ханна бааллара буолуой?" дии санаабыппыт, олох да аттыбытыгар бааллар эбит. “Доруобуйа” диэн лааҕырбытыттан чугаһа олус үчүгэй. Сэлиилэри оҥорбут дьоҥҥо улахан махталбытын тиэрдэбит. Комплекс креативнай дириэктэрэ Андрей Ли географ идэлээх. Онон, оҕолорго иитэр-үөрэтэр сыаллаах бырагырааммалар тэриллэллэрэ тоҕоостоох. Барыгытыгар улахан махтал ”.
Санатабыт, “Улуу Тоҕойго” оҕолорго аналлаах уонна дьиэ кэргэнинэн сынньанарга билиэттэр атыыга тахсыахтара. Комплекс Табаҕа тумуһугар “Северная мозаика” сиригэр, Табаҕа бөһүөлэгин кэннинэн баар. Билсэр нүөмэргит 8-922-222-08-76, Инстаграм: uluu_togoi
