Хаарбах туруктаах эргэ дьиэҕэ олорор Олег Кошевой аатынан уулуссаҕа олорор Марха олохтоохторо муус устар ыйга саҥа дьиэҕэ көһүөхтэрэ. Бу туһунан Дьокуускай куорат баһылыга өрөбүллээҕи сырыытын түмүгэр эттэ. Санаттахха, “OneсlickYakutsk” бартаалга ыытыллыбыт куоластааһыҥҥа бу эбийиэк саамай элбэх куолаһы хомуйан, сайаапка киирбитэ.
Салгыы Айсен Николаев Кирзавод оройуонун олохтоохторун кытары көрүстэ. Бу оройуон олохтоохторо киин уунан хааччыллыыга холобонон эрэллэр. Ол курдук, Заводской уулусса олохтоохторугар уу кулун тутар 15 күнүттэн баар буолбут.
“Биһиги ууну наһаа өр күүппүппүт. Дьэ, куоракка олорор курдук бэйэбитин сананар инибит. Таҥас сууйар массыына атыыластым” диэн олохтоох Надежда Домажакова этэр.
Андрей Лебедев, МУП “Жилкомсервис” тэрилтэ дириэктэрэ:
– Бүгүҥҥү күҥҥэ киин уунан хааччыллыыга Кирзовод оройуонугар 12 элбэх кыбартыыралаах дьиэ киирдэ. Сыл бүтүөр диэри “Солнышко” дьыссаат, Марха орто оскуолата уонна “Чэчир” сынньалаҥ киин о.д.а. уунан хааччыллыахтара.
Көрсүһүүгэ кэлбит олохтоохтор кыһалҕаларын эмиэ кэпсээтилэр. Холобур, кытыы уулуссаларга ититии үчүгэйдик тиийбэт эбит. Кини томмот туһуттан ититии систиэмэтиттэн ууну сүүрдэргэ күһэллэллэрин туһунан эттилэр. Баһылык бу кыһалҕаны болҕомтоҕо ылла. Кини хомунаалынай хаһаайыстыба үлэһиттэригэр туохтан маннык кыһалҕа үөскүүрүн үөрэтэргэ сорудахтаата.
Сырыы түмүгэр мээр Олег Кошевой уулусса олохтоохторун кытары көрүстэ. Олохтоохтор хаһыс да сылын эргэ туруктаах дьиэҕэ олороллорун туһунан этэллэр эбит да, сөптөөх болҕомто уурулла илик эбит. Бу дьиэни 2012 сыллаахха хаарбах туруктаах дьиэлэр ахсааннарыгар саҥа киллэрэн, 2017 сыллаах бырагыраамаҕа хапсыбакка хаалбыт. Бүтэһик иһитиннэриинэн, хаарбах туруктаах дьиэ 2019 сылтан үлэлиэхтээх бырагыраамаҕа киириэхтээх. Онуоха олохтоохтор уһун кэмҥэ күүтэр кыахтара суох буолан, “OneсlickYakutsk” бартаалга суруйбуттар.
Дьокуускай куорат баһылыга Айсен Николаев, билигин бу аадырыска олорор олохтоохтору көһөрүү боппуруоһа быһаарылла турарын туһунан эттэ. Кинилэр муус устар ыйга саҥа дьиэҕэ көһөлөөрө күүтүллэр.
