Тохсунньу 30 күнүгэр Дьокуускай куоракка, 203-с түөлбэҕэ Воинскай уулуссатын 9/3 уонна 21 куорпуһугар элбэх кыбартыыралаах дьиэлэргэ саҥа кыбартыыралар күлүүстэрин тулаайах оҕолорго туттарар үөрүүлээх тэрээһин буолан ааста.
Дьиэлэр “2018-2022 сылларга тулаайах уонна төрөппүт көрүүтэ-истиитэ суох хаалбыт оҕолору дьиэнэн хааччыйыы” диэн муниципальнай бырагыраамма чэрчитинэн бэриллибит. Тутааччы — “ДСК” АО.
Саҥа кыбартыыралар хаһаайыттарыгар күлүүстэри куорат баһылыга Сардана Авксентьева уонна “ДСК” АО генеральнай дириэктэрэ Сергей Радь туттардылар. Үөрүүлээх тэрээһиҥҥэ Автодорожнай уокурук салайааччыта Артур Аргунов уонна Губинскай уокурук салайааччыта Айаал Бурцев, уопсастыбанньыктар, куорат олохтоохторо кыттыыны ыллылар.
“Хас биирдии киһиэхэ саамай сүрүнэ дьиэ кэргэнэ уонна бас билэр дьиэтэ-уота буолар. Бүгүҥҥү күнтэн эһиэхэ саҥа олох саҕаланар. Эһиги дьиэҕитигэр куруук үөрүү-көтүү, дьол тосхойдун уонна сылаас, сырдык буоллун”, — диэн Сардана Авксентьева эҕэрдэлээтэ.
Оттон оҕолор ааттарыттан Ирина Данилова махтал тылын эттэ: “Биһиэхэ бүгүн олус үөрүүлээх күн үүннэ. Олохпут саҥа кэрдииһэ саҕаланна. Ыалларбар дьолу, тапталы уонна этэҥҥэ буолууну баҕарабын”.
Оттон “ДСК” АО генеральнай дириэктэрэ Сергей Радь саҥа дьиэлэр биэс сыл гарантиялаахтарын, ону таһынан, күүс-көмө буоларга бэлэмнээхтэрин эттэ.
Дьиэ-уот департаменын иһитиннэриитинэн, бу күннэргэ 2018 сылга дьиэнэн хааччыйыыга мэктиэлэммит 186 тулаайах оҕо саҥа кыбартыыралары ылыахтара. Онно 49 муниципальнай хантараак номнуо баттаммыт. Оттон 2019 сылга дьиэнэн хааччыйыыга мэктиэлэммит 82 оҕоҕо 40 кыбартыыраны ылар 4 муниципальнай уонна иккис ырыынактан 42 кыбартыыраны ылар 42 муниципальнай хантараактар оҥоһуллубуттар. Бу туһунан Дьокуускай куорат дьаһалтатын уопсастыбаннаһы уонна СМИлэри кытта сибээс департамена иһитиннэрэр.