Ааспыт сылга Дьокуускай куорат баһылыгын отчуотугар Ил Түмэн дьокутаата Мария Христофорова, 203-с түөлбэҕэ Ларионов аатынан уулуссанан 3-с уонна 17-с №-дээх оптуобустар сырыыларын 11-с куорпуска диэри уһатар туһунан этии киллэрбитэ.
Ону таһынан, эбии 35-с, 20-с, 5-с №-дээх оптуобустар сылдьалларын туһунан боппуруоһу көрөллөрүгэр эппитэ. Куорат баһылыга 3-с уонна 17-с №-дээх оптуобустар сырыыларын уһатарга туох да кыһалҕаны көрбөтүн эппитэ. Онон оптуобус саҥа тохтобула бу саас тутуллуоҕа.
“Ааспыт сыл алтынньы ыйыгар 203-с түөлбэ олохтоохторун кытта, Ларионов аатынан уулуссаҕа 11-с куорпус аттыгар, ДШИ утары эбии тохтобул оҥорор туһунан куорат мээрийэтигэр этии киллэрбиппит. Билигин 20-с куорпус аттыгар биир соҕотох тохтобул баар. Ааспыт күһүн 203-с түөлбэ олохтоохторун көрдөһүүтүнэн Дьокуускайдааҕы тутуу салалтата уонна ГИБДД көһө сылдьар мунньаҕар, бу хайысханан дьон хайдах сылдьарын үөрэтэр туһунан этиллибитэ. Бээтинсэҕэ суол-иис салалтатын начаалынньыгыттан В. А. Домотовтан официальнай сурук туттум. Онно маннык суруллар: “Бу сыл сааһыттан 203-с түөлбэҕэ Ларионов аатынан уулусса 11-с куорпуһун аттыгар эбии тохтобул оҥоһуллуо”. Күндү быыбардааччыларым, биһиги биир сомоҕо күүс буолабыт”, – диэн Мария Христофорова эттэ.
