Кулун тутар 7 күнүгэр Табаҕа бөһүөлэгэр, “Кедр” култуура дьиэтин үөрүүлээх арыллыыта буолан ааста. Санатар буоллахха, бу эбийиэги Айсен Николаев куорат баһылыгынан үлэлии сылдьан туттаран саҕалаабыта.
Икки мэндиэмэннээх таас дьиэ көрөөччү саалыгар кубулуйар сыаналаах, бибилэтиэкэлээх, үҥкүү саалалаах, айар үлэ куруһуоктарыгар аналлаах киэҥ-куоҥ хостордоох. Саҥа эбийиэк үөрүүлээх арыллыытыгар Ил Дархан Айсен Николаев уонна куорат баһылыга Сардана Авксентьева ыалдьыттаатылар.
Айсен Сергеевич Табаҕа олохтоохторун Аан дойду кэрэ аҥаардарын күнүнэн уонна Култуура дьиэтин арыллыытынан эҕэрдэлээтэ. “Биһиги 2015 сыллаахха Култуура дьиэтин тутуутун саҕалаабыппыт. Куорат күнүгэр бастакы сыбаайаларын түһэрбиппит. Бу эбийиэк Аан дойду кэрэ аҥаардарын күнүгэр үлэҕэ киирбитэ олус үчүгэй. Мантан инньэ Табаҕа олохтоохторо, оҕолор айар үлэнэн дьарыктаналларыгар бары усулуобуйа баар буолла”, – диэн эттэ. Ону таһынан, кэнники сылларга Мархаҕа уонна Маҕаҥҥа Култуура дьиэлэрэ тутуллан үлэҕэ киирбиттэрин бэлиэтээтэ. Куорат таһынааҕы бөһүөлэктэргэ социальнай эбийиэктэри тутуу өссө да салҕанарын эттэ. Тутааччыларга, куорат дьаһалтатыгар, саҥа эбийиэк үлэҕэ киирэригэр кыттыгыстаах дьоҥҥо барыларыгар улахан махталын тиэртэ. Култуура дьиэтин дириэктэригэр Светлана Ивановаҕа уот-күөс тэрилин ыларга сэртипикээти туттарда. Олохтоохтор дохсун ытыс тыаһынан махталларын биллэрдилэр.
