Кулун тутар 25 күнүттэн бырабыыталыстыба уонна парламент массыыналара доруобуйа харыстабылын министиэристибэтин дьаһалыгар киирдилэр. Бу туһунан кабмин пресс-сулууспата иһитиннэрэр.
Санатар буоллахха, бу туһунан дьаһалы Ил Дархан Айсен Николаев таһаарбыта. Ол курдук 20 массыына Мэдэссиинэ киинигэр, 2-с, 3-с №-дээх балыыһаларга уонна 1 №-дээх поликлиникаҕа үлэлиэхтэрэ.
Доруобуйа харыстабылын министиэристибэтин суһал штабын салайааччы Алена Барашкова иһитиннэрбитинэн, массыыналар мэдэссиинэ үлэһиттэрин ыҥырыыларга таһаллар. “Билигин ыарыһахтар быраастары дьиэлэригэр ыҥыраллар. Күҥҥэ 30-тан 100 тахса ыҥырыы киирэр”, – диэн этэр. Ону таһынан, быраастар уонна суоппардар харыстанар тэриллэринэн хааччыллыбыттарын бэлиэтиир.
