Сарсыарда өттүгэр маннык чуумпу буолар. Үгүс дьон хоруона вируһуттан сэдиптээх хааччахтааһыны билиммэт.
“Дьиэҕитигэр олоруҥ, бэйэҕитин, чугас дьоҥҥутун суостаах дьаҥ кутталыгар чугаһатымаҥ!” диэн уулуссаҕа туруоруллубут араадьыйа тэриэбэтиттэн сөҥ куолас иһиллэр. Ону долоҕойугар хатааччы бэрт ахсааннаах эбит бадаҕа. Күнүс таһырдьа оонньуу сылдьааччы, оҕо былаһааккаларыгар көрүлээччи, подъезтарга мустар ыччат үгүс. Сквердэргэ, пааркаҕа дьаарбайааччы – баһаам. Уулуссаларга массыына толору. Арыт, киэһэтин дьоппуон матасыыкылынан “орулатан-сарылатан” дьону уйгуурдаллар. Полиция, Росгвардия куорат уулуссаларын, болуоссаттарын кэрийэллэр. Дьаарбайа сылдьааччылары тохтотон, сороҕор боротокуол толоро турар буолаллар. Ол эрэн, маннык ылааҥы күннэргэ, дьон түөрт истиэнэҕэ хаайтаран олорорун сөбүлээбэтэ чахчы. Ол иһин таһырдьа, сибиэһэй салгыҥҥа дьулуһаллар. Күн бүгүн Мииринэйгэ хоруона вируһугар анаалыһа бигэргэммит биир ыарыһах баар. Обсерватордарга 75 киһи сытар.
Станислав Алексеев, Мииринэй куората.
